दधिराज सुवेदी पुरस्कार प्रतिष्ठान विराटनगरले शनिबार भाषा साहित्य र पत्रकारिता पुरस्कार-२०८० क्रमश: कथाकार तथा आख्यानकार भगिरथी श्रेष्ठ र पत्रकार धर्मेन्द्र झालाई प्रदान गरेको छ । त्यस्तै भक्तपुर क्यान्सर अस्पतालका चिकित्सक डा उज्जवल चालिसेलाई पनि दधिराज सुवेदी सेवा सम्मानद्वारा सम्मान गरिएको छ ।
दुवै पुरस्कार र सम्मान कांग्रेस नेता डा शेखर कोइरालाले वितरण गरेका थिए । डा उज्जवल चालिसे दधिराज सेवा सम्मान भाषा साहित्य पुरस्कारको राशी ५१ हजार र पत्रकारिता पुरस्कारको राशि २५ हजार रुपैयाँ छ ।
यसअघि भाषा साहित्य पुरस्कारबाट गोविन्दराज भट्टराई, अभि सुवेदी, माधवप्रसाद पोखरेल, विष्णुविभु घिमिरे, एस्पी कोइराला, चुणमणि बन्ध र सनत रेग्मी तथा पत्रकारिता पुरस्कारबाट हरिवहादुर थापा, शिवबहादुर कार्की, हरिहर विरही, मोहन भण्डारी, किशोर नेपाल, भूषण दाहाल र अनन्तराज न्यौपाने सम्मानित भइसकेका छन् ।
सुवेदीका छोरा शरदराज र रुपकले आफ्ना जीवित बाबु दधिराजको नाममा १५ लाख रुपैयाँको अक्षय कोषको व्यवस्था गरेर २०७३ सालदेखि प्रतिष्ठानले यो पुरस्कार वितरण गर्दै आएको छ ।
