नेपाली साहित्यमा लामो समयदेखि कलम चलाउँदै आएका कवि गोपाल पौड्याल ‘मण्डने’को मुक्तकसंग्रह ‘झरनाको पानी’को सार्वजनिक भएको छ ।
वरिष्ठ साहित्यकारद्वय मोहन दुवाल र सूर्यप्रसाद लाकोजूले कृति विमोचन गरेका हुन् । कार्यक्रममा प्रमुख अतिथि दुवालले मुक्तकमा मानिसलाई आकर्षण गर्ने शक्ति भएकोले यो विधा लोकप्रिय रहेको विचार राखे । कृतिमाथि समीक्षात्मक टिप्पणी गर्दै साहित्यकार रामसुन्दर देउजाले झरनाको पानीमा नेपाली समाजको यथार्थ चित्रण रहेको बताए । अर्का टिप्पणीकार तुयुकाजी ताम्राकारले मुक्तककार मण्डनेको योगदान नेपाली साहित्यमा उल्लेखनीय रहेको बताए । मुक्तकसंग्रहमा मानव जीवनका भोगाई, अनुभूति रहेकाले पाठकको मनलाई सहजै स्पर्श गर्नसक्ने विचार मुक्तककार पौड्यालले व्यक्त गरे ।
मुक्तकसंग्रहमा विभिन्न विषय र प्रसंगमा रचिएका १०१ ओटा मुक्तक छन् । राष्ट्रप्रेम, संस्कृतिप्रेम, प्रकृतिप्रेम, सामाजिक मेलमिलाप, संस्कृतिको महत्व झल्काउने विभिन्न विषयहरूमा रचिएका मुक्तकहरूले पाठकको मन आकर्षित गर्न सक्दछन् । पुस्तकमा रहेका मुक्तकहरुले देशभक्ति, नैतिकता, सामाजिक मूल्य र मान्यताको सन्देश बोकेको छ ।
