लेखक, साहित्यकार तथा पाँचथरको फाल्गुनन्द गाउँपालिकाका तत्कालीन अध्यक्ष अमर नेम्वाङको स्मृतिमा स्थापित ‘स्वर्गीय अमर नेम्वाङ स्मृति पुरस्कार’ तीन जनालाई प्रदान गरिने भएको छ । पुरस्कार छनोट समितिको आइतबार बसेको बैठकले पत्रकार एवं निबन्धकार दीपक सापकोटा, कवि देवेन्द्र शक्तेन राई र साहित्यकार मलिसा याक्थुङ्बा लिम्बूलाई पुरस्कार प्रदान गर्ने निर्णय गरेको हो । सापकोटाका ‘लोकेसन’ र ‘निर्बन्ध मोन्टाज’ प्रकाशित छन् । पाण्डुलिपि मासिकका पूर्वसम्पादक सापकोटा हाल कान्तिपुर दैनिकको साप्ताहिक परिशिष्टांक ‘कोसेली’का संयोजक हुन् ।
पुरस्कृत हुने कवि देवेन्द्र शक्तेन राई पाँचथरको ‘दन्त्य कथाको देश’ कविता संग्रह प्रकाशित छ । याक्थुङ भाषामा कलम चलाउँदै आएका मलिसा याक्थुङ्बा लिम्बू वरिष्ठ साहित्यकार हुन् । उनका दर्जनौं कृति प्रकाशित छन् ।
पुरस्कारको राशी जनही ५० हजार रूपैयाँ रहेको अमर नेम्वाङ स्मृति प्रतिष्ठानका अध्यक्ष मुनिन्द्र नेम्वाङले जानकारी दिएका छन् । नेम्वाङका अनुसार अनुसार यो वर्ष वितरण हुन लागेको पुरस्कार सातौं संस्करणको हो । यसअघि उक्त पुरस्कार कृष्ण धरावासी, स्वप्निल स्मृति, श्रवण मुकारुङ, प्रेम ओझा, शारदा सुब्बा, बिना थिङ, डा.गोविन्दराज भट्टराई, वीर नेम्बाङ, देवी क्षेत्री दुलाल, मुनराज शेर्मा, विमला तुम्खेवा र गिरिराज बास्कोटालाई प्रदान गरिसकिएको छ ।
पुरस्कार दिवंगत अमर नेम्वाङको स्मृति दिवसको अवसरमा हरेक वर्ष माघ २६ गते प्रदान गरिन्छ । नेम्वाङको फाल्गुनन्द गाउँपालिकाको अध्यक्ष भएका बेला २०७५ सालमा हृदयघात भएर निधन भएको थियो । उनको स्मृतिमा स्थापना गरिएको प्रतिष्ठानले साहित्य, शिक्षा र सामाजिक सेवाका क्षेत्रमा निरन्तर योगदान पुर्याउँदै आएको छ।
