कृष्ण गौतमको उपन्यास ‘अद्वैत’ले एक लाख २५ हजार रुपैयाँको कविडाँडा आख्यान पुरस्कार प्राप्त गरेको छ ।
सौराहामा आयोजित कार्यक्रममा उक्त पुरस्कार प्रदान गरियो । विस २०६० सालमा स्थापित भरतपुरको साहित्यिक संस्था कविडाँडा साहित्य समाजले विस २०७५ सालदेखि ‘कविडाँडा आख्यान पुरस्कार’ दिन सुरू गरेको हो । सुरुमा ३० हजार रुपैयाँको यो पुरस्कार गत वर्षबाट सवा लाख रुपैयाँको भएको हो ।
विस २०८० मा प्रकाशित आख्यान अर्थात कथा र उपन्यासहरुमध्ये सर्वोत्कृष्ट भएका कारण ‘अद्वैत’ पुरस्कृत भएको संस्थाका अध्यक्ष एलबी क्षेत्रीले बताए ।
यसअघि ७५ सालमा महेश थापाको कथा संग्रह मरीचिका, ७६ सालमा श्याम साहको कथा संग्रह पथेर, ७७ सालमा भुवन ढुंगनाको उपन्यास परित्यक्ता र ७८ सालमा लोकराज भट्टको उपन्यास छाइलले कविडाँडा आख्यान पुरस्कार पाइसकेका छन् । गत वर्ष डा.देवीप्रसाद सुवदीको उपन्यास ‘मनु’ले यो पुरस्कार पाएको थियो ।
वर्षभरीमा प्रकाशित आख्यान अर्थात कथा र उपन्यासमध्ये उत्कृष्ट छनौट गरेर दिइने यो पुरस्कार राशी नेपालभरी मै सर्वाधिक रहेको छ ।
समाजले प्रत्येक वर्ष देव–खीना स्मृति पुरस्कार तथा सम्मान, युवा पुरस्कार, कविडाँडा कृति पुरस्कार र काव्य पुरस्कार पनि दिदै आएको छ । लेखनलाई प्रतिस्पर्धी र गुणस्तरीय बनाउन उत्प्रेरित गर्न यसो गरेको अध्यक्ष थापाले बताए ।
