बालगायक सुप्रिममल्ल ठकुरी ‘सरुभक्त राष्ट्रिय बालप्रतिभा पुरस्कार–२०८०’ बाट पुरस्कृत हुने भएका छन् । सरभक्त केन्द्रले ५० हजार रुपैयाँ राशिको पुरस्कार पहिलोपल्ट सुप्रिमलाई प्रदान गर्ने भएको हो ।
साहित्यकार सरस्वती ‘प्रतीक्षा’ संयोजकत्वमा गठित प्रतिभा छनोट समितिको सिफारिसलाई सरुभक्त केन्द्रले अनुमोदन गर्दै पुरस्कार प्रदान गर्ने निर्णय गरेको थियो ।
पुरस्कारका लागि पोखरामा रहेका साहित्यकार सरुभक्त श्रेष्ठले आफ्ना बुबा गणेशबहादुर श्रेष्ठ र आमा लक्ष्मीमाया श्रेष्ठको स्मृतिमा ११ लाख ५० हजार रुपैयाँको अक्षयकोष स्थापना गरेका छन् । आफ्नो अदम्य प्रतिभा देखाइ मुलुकको इज्जत, प्रतिष्ठा र गरीमा कायम गर्न सफल १६ वर्षमुनिका नेपाली बालबालिकालाई हरेक वर्ष यो पुरस्कार प्रदान गरिने सरुभक्त केन्द्रका अध्यक्ष महेन्द्र श्रेष्ठले बताए । उनकाअनुसार यसअघि ०५६ मा स्थापित राष्ट्रिय बालप्रतिभा पुरस्कारको अक्षयकोषमा १ लाख रुपैयाँ थियो । हाल सरुभक्तले १० लाख ५० हजार रुपैयाँ थपेर अक्षरकोष ११ लाख ५० हजार बनाइएको हो । त्यतिबेला प्रत्येक वर्ष १५ हजार रुपैयाँबाट बालप्रतिभालाई पुरस्कृत गरिन्थ्यो ।
२०५७ बाट त्यस्तो पुरस्कार वितरण थालिए पनि ०६९ बाट निरन्तरता पाउन सकेको थिएन । पहिलोपल्ट उक्त पुरस्कार ०५७ मा कान्छो पर्वतारोही तेम्बाछिरी शेर्पालाई प्रदान गरिएको थियो । उक्त पुरस्कारको सञ्चालन पोखराकै कुमुदिनी होम्सले गर्थ्यो ।
बाजुरामा जन्मिएका सुप्रिम हाल काठमाडौंमा ६ कक्षामा अध्ययनरत छन् । उनले अध्ययनसँगै गायनलाई अघि बढाउने क्रममा सानै उमेरमा गीतसंगीतको क्षेत्रमा उल्लेखनीय सफलता हासिल गरेर चर्चा कमाएका छन् । रियालिटी सो भ्वाइस अफ किड्सको पहिलो सिजनमा पहिलो रनर अप भएलगत्तै चर्चा एकाएक चुलिएको थियो । हालसम्म उनका १ सय ९० वटा गीत रेकर्ड भएर सार्वजनिक भएका छन् । उनको स्वरमा लोकगीत, लोक दोहोरी गीत, चलचित्र गीत, आधुनिक गीत, देशभक्त गीत, बालगीतलगायत देउडा, ठाडोभाका, गजल, सालैजो, पूर्वेलीभाका, लिम्बु, किराती, मधेसी, नेवारी भाकाका गीतहरु रेकर्ड भइसकेका छन् ।
पछिल्लो समय उनी देश तथा विदेशभित्र कन्सर्ट, मेला, महोत्सवमा सहभागी भइरहेका छन् । एक दर्जनभन्दा बढी पुरस्कारबाट पुरस्कृत भइसकेका छन् । ११ वर्षीय सुप्रिमलाई माघ २७ मा सरुभक्त राष्ट्रिय बालप्रतिभा पुरस्कार अर्पण गरिने सरुभक्त केन्द्रका अध्यक्ष महेन्द्र श्रेष्ठले बताए ।
