हरेक वर्षको पौष शुक्ल पूर्णिमाका दिन शुरु हुने हिन्दू धर्मावलम्बीको श्रीस्वस्थानी व्रतकथा तथा माधवनारायणको पूजा आराधना आजबाट शुरु भएको छ । प्रत्येक वर्ष पौष शुक्ल पूर्णिमादेखि माघ शुक्ल पूर्णिमासम्म एक महिनासम्म हरेक दिन घरघरमा स्वस्थानी कथा भन्ने र सुन्ने गरिन्छ । स्वस्थानी परमेश्वरीको व्रत बसे तथा उहाँको कथा भने र सुने मनोकांक्षा पूरा हुने धार्मिक विश्वास छ ।
स्वस्थानी व्रत कथाअनुसार सालीनदी क्षेत्र ऐतिहासिक एवं पौराणिक स्थान भएकाले पनि यसको महत्त्व बढेको छ। त्यसैले व्रत अवधिभर भक्तजन सालीनदी पुग्ने गरेका छन्। यहाँ पुग्ने भक्तजनले सालीनदीमा नुहाउने प्रचलन छ। सालीनदीमा स्नान गरेपछि माधवनारायण तथा स्वस्थानी माताको दर्शन गर्दा पुण्य मिल्ने जनविश्वास रहँदै आएको छ। त्यस्तै ब्रतालुलाई दान गर्दा पनि पुण्य मिल्ने मान्यता छ।
