१.धर्म गर्नेले धर्म छोडी किन द्वन्द्व गर्नु पर्छ
मानवता नै बिर्सिएर किन तल झर्नु पर्छ
बरबाद भए कति देश हामी सामु छर्लङ्ग छ
निरपराध जनताले फेरि किन मर्नु पर्छ?
२.आफ्नै घर आँगनमा आगो बाल्दै नहिड हे
बहकाइमा लागि उल्टो पाइला चाल्दै नहिड हे
सहिष्णुता, सद्भाव नेपालीका मूल धन हुन्
बिर्सिएर एकताको मूर्ति ढाल्दै नहिड है !
३ धर्म, जाति- गृहयुद्ध कसले सोचिबसेका छन्
जहाँ दुख्छ त्यही ठाउँ कसले घोचिबसेका छन्
सद्भावहरू हराएर अराजकता फैलँदै छ
नेताहरू सबै मुखमा बुजो कोचिबसेका छन् !
४.विदेशीका इसारामा चल्नेदेखि होसियार
आफ्नो रूप लुकाएर छल्नेदेखि होसियार
सत्य अनि न्यायको लागि मिली काम गर्नुपर्छ
दावानल जस्तो यहाँ बल्नेदेखि होसियार!
५.लडी मरे यदु वंशीहरू त्यही बाटो लाग्नुहुन्न
जाग्नु पर्छ अरूसित जोरी खोजी जाग्नुहुन्न
गरिबी, अन्याय, विभेद वैरीहरू धेरै नै छन्
भाइले भाइ मार्ने गरी कुनै शस्त्र दाग्नुहुन्न !
