सिक्किमेली लेखक प्रज्वल पराजुलीको उपन्यास ‘ल्यान्ड ह्वेर आई फ्ली’ नेपाली भाषामा पनि अनूदित भएको छ । लेखक प्रज्वलले लेखक नारायण वाग्लेलाई पुस्तक उपहार दिएर विमोचन गरेका थिए । ‘ल्यान्ड ह्वेर आई फ्ली’लाई अंग्रेजीबाट नेपालीमा विभु लुइटेलले अनुवाद गरेकी हुन् ।
पुस्तक अनुवाद, लेखन र पात्रबारे प्रज्वलसँग लेखक सगुना शाहले अन्तरक्रियासमेत गरेकी थिइन् । अन्तरक्रियाका क्रममा ‘द गुर्खाज् डटर’ कथासंग्रहका लेखकसमेत रहेका प्रज्वलले आफ्ना महिला पात्रहरू शक्तिशाली हुने बताए । उनको पहिलो कृति ‘गुर्खाज् डटर’ ‘गोर्खाकी छोरी’का नाममा नेपालीमा प्रकाशित छ । उनका दुवै पुस्तक पब्लिकेसन्स् नेपालयले प्रकाशन गरेको हो । ‘ल्यान्ड ह्वेर आई फ्ली’ फ्रान्सेली भाषामा समेत अनूदित भएको छ । उनका आख्यानहरूमा नेपाली पहिचान बोकेका पात्र र प्रवृत्तिको मिहिन चित्रण भेटिन्छ ।
प्रज्वलका कृतिहरू बेलायतका ‘डिलन थोमस प्राइज’ र ‘मोगफोर्ड प्राइज’ एवं फ्रान्सको ‘इमिल गिमेट प्राइज’ को अन्तिम सूचीमा अनि फ्रान्सकै ‘डेब्यु नोभल प्राइज’ र अमेरिकाको ‘द स्टोरी प्राइज’ को मनोनयनमा पर्न सफल भइसकेका छन् । उनी सन् २०१८ र २०२३ मा गरी दुई पटक ‘डिलन थोमस प्राइज’ को निर्णायकसमेत रहिसकेका छन् ।
