नेपाली शिक्षा परिषद्ले कवि–साहित्यकार शैलेन्दुप्रकाश नेपाललाई गोपाल पाँडे असीम पुरस्कार प्रदान गरेको छ । परिषद्को ७३ औं स्थापना दिवस एवं असीमको १११ औं जन्म जयन्ती अवसर पारेर आयोजित समारोहमा नेपाललाई पुरस्कृत गरिएको हो ।
पद्मकन्या क्याम्पसमा प्राध्यापनरत नेपालका साहित्यका विविध विधाका तीन दर्जनभन्दा बढी कृति प्रकाशित छन् । ५० हजार रुपैयाँ रहेको उक्त पुरस्कार प्राध्यापक पार्थिवेश्वर तिमिल्सिनाले हस्तान्तरण गरेका थिए । प्राध्यापक तिमिल्सिनाले नेपाली भाषाको विकासमा संस्थागत प्रयास गर्ने पक्षमा असीमको योगदान अविस्मरणीय रहेको बताए ।
नेपाली भाषा, शिक्षा र साहित्य क्षेत्रमा विशिष्ट योगदान गरेका असीमको जन्म १९७० जेठ १५ मा काठमाडौंको प्याफलमा भएको थियो । शिक्षा प्रणालीमा नेपाली भाषाको वर्चस्व कायम गर्ने उद्देश्यसाथ उनले नेपाली शिक्षा परिषद् स्थापना गरेका थिए । व्याकरण पुस्तक ‘ह्रस्वदीर्घ आदिको सवाई’ (१९९७) सहित उनका केही काव्य प्रकाशित छन् । उक्त पुरस्कार उनकै छोरी साहित्यकार रमा शर्माले स्थापना गरेकी हुन् ।
