साहित्य सन्ध्याकोे ४४३ औँ विशेष शृङ्खलामा नेपाली प्रगतिवादी साहित्यमा योगदान गरिरहेका पाँचजना विशिष्ट व्यक्तित्वलाई २०७९ सालका ‘साहित्य सन्ध्या पुरस्कार तथा सम्मान’ अर्पण गरियो ।
नियात्राकार नन्दकला सुवेदीलाई ‘हरिप्रिया–हरिप्रसाद चापागाईं नियात्रा पुरस्कार एवम् सम्मान–२०७९’ समर्पण गरिएको छ । कार्यक्रममा ९३ वर्षिया सुवेदीद्वारा लिखित नियात्राकृति ‘अठासी वर्षमा कैलाश मानसरोवर’का लागि उनलाई सम्मानित गरिएको हो । स्वास्थ्यका कारण कार्यक्रममा अनुपस्थित सुवेदीको पुरस्कार उनका परिवारजनले ग्रहण गरेका थिए । चालीस वर्षको उमेरमा अक्षर चिनेर प्रौढ शिक्षिका तथा सामाजिक अभियन्ता बनेकी सुर्खेतकी सुवेदीले केही वर्षअघि कैलाश मानसरोवर यात्रा गरेकी थिइन् । कार्यक्रममा ‘अठासी वर्षमा कैलाश मानसरोवर’ पुस्तकमाथि चर्चा गरियो । सोअवसरमा वक्ताहरूले जेष्ठ नागरिकको यो कृति, उनी स्वयम् र उनको यो यात्रा हरेकका लागि प्रेरणादायी भएको बताए ।
साहित्य सन्ध्याद्वारा आयोजित उक्त कार्यक्रममा साहित्यकार उमेश उपाध्यायलाई २०७९ सालको ‘साहित्य सन्ध्या पुरस्कार तथा सम्मान’, साहित्यकार खेमराज निरौलालाई २०७९ सालको ‘साहित्य सन्ध्या सहभागिता पुरस्कार तथा सम्मान’, वरिष्ठ स्नायु रोग विशेषज्ञ डा. वसन्त पन्तलाई २०७९ सालको ‘साहित्य सन्ध्या–कृबा’ पुरस्कार तथा सम्मान र अर्घाखाँचीकी विद्यार्थी गोमा कामीलाई २०७९ सालको ’साहित्य सन्ध्या–मन पुरस्कार तथा सम्मान’ समर्पण गरिएको थियो ।
