प्राकृतिक स्रोतको जथाभाबी दोहनका कारण पृथ्वीवासीले समस्या भोगिरहेको सन्दर्भमा प्रकृति नै मानव अस्तित्वको मूल स्रोत हो भन्ने सन्देशका साथमा बोधिसत्त्व ग्यालरीमा मानव अस्तित्वसँग प्रत्यक्ष सरोकार राख्ने ‘प्रकृति’ मा आधारित चित्र, मूर्ति कला प्रदर्शनी हुदैंछ । पृथ्वीमा जीवन सम्भव बनाउने तत्त्वहरू आगो, पानी, आकाश, भूमि र हावा, रुख बिरुवालगायतका प्राकृतिक सम्पदाको पूजा गर्दै प्रकृति र मानव बिचको सहअस्तित्वलाई स्विकार्ने परम्पराको मूल सन्देश प्रदर्शनीको मुख्य उदेश्य हो । । ती तत्त्वलाई सनातन हिन्दु र बौद्ध परम्परामा भगवानका स्वरूपमा पूजा गरिन्छ । बोधिसत्त्व ग्यालरीका निर्देशक प्रज्वल शाक्य भन्छन्, प्रकृतिको रक्षाका लागि चेतना जगाउन प्रदर्शनी आयोजना गरिएको हो ।
प्रदर्शनीमा युवालाई आकर्षित गर्न डिजिटल एनिमेसन राखिएको उनले जानकारी दिए । उक्त डिजिटल एनिमेसनमा असनको देउता देखाइएको उनको भनाइ छ ।
आर्ट ग्यालरीका संचालक अञ्जना शाक्य अहिले जलवायु परिवर्तनको असरले निकै चिन्तित हुदैं भन्छिन्, पहिले जलवायु परिवर्तनको असरको चर्चा सुन्दा यसको असर हामीलाई नि पर्ला र ? भन्ने लाग्थ्यो । वास्तवमा यसको प्रभावले हाल बाढी पहिरो, आगलागी, तथा वायु प्रदूषण हामीले झेलिरहेका छौँ । हिमालमा कम मनसुन हुने ठाउँमा समेत बाढी पहिरोको विनाश भई रहेको छ । केही समय अघि कागबेनीमा आएको विनाशकारी पहिरोलाई हेर्ने सक्छौँ । अहिले हामी आधुनिक भयौँ तर प्रकृतिको महिमालाई भुल्दै गयौँ । समाजमा विद्यमान परम्परागत संस्कारले प्रकृतिसँग एकाकार हुन सहयोग पु–याउँदो रहेछ ।” उनका अनुसार बिहान उठेर ढोकाको अगाडि लिपेर भूमि पूजा गर्ने, इनार, नदीको पूजा, रातमा आकाशलाई दीप दिने, पिपलका रुखलाई पुज्ने परम्परा त प्रकृतिप्रति कृतज्ञता व्यक्त गर्नु हो, आभार प्रकट गर्नु हो । उहाँ भन्नुहुन्छ, “यी सबै सनातनी कर्मलाई निरन्तरता दिइरहँदा नयाँ पुस्तालाई यसको महत्त्व पनि बुझाउँदै जानु पर्छ ।”
प्रदर्शनीमा अन्नपूर्णेश्वरी, शिव पार्वती, विवाह संस्कार, चराका चित्र, मूर्ति, बोधिसत्त्व, पञ्च बुद्धका अमूर्त चित्रकला, पञ्च बुद्धका वाहन, सहित नयाँ पुस्ताका लागि ‘थ्रिडी डिजिटल’ माध्यमबाट समेत प्रकृतिको महत्वबारे बुझाउने व्यवस्था गरिएको छ ।
प्रज्वलका बुबा स्वर्गीय पूर्णमान शाक्यले नेपाली परम्परागत कलाको महत्वलाई धार्मिक, पौराणिक कलालाई खरिद गरी सङ्कलन र संरक्षण गर्दै आएको छ । पूर्णमान शाक्यको योगदान र रहरलाई जीवन्त बनाउन परिवार नै लागि परेका छन् । जहाँ नयाँ प्रविधि डिजिटल एनिमेसन समेत समावेश गर्दे नेपाली परम्परागत कलालाई सबैमाझ देखाउने सोच बनाएका छन् । प्रदर्शनीमा चर्चित एवं वरिष्ठ कलाकारहरू लोक चित्रकार उदय चरण श्रेष्ठ, राजप्रकाश तुलाधर, मिना डङ्गोल, पुष्पलाल डङ्गोल, समुद्रमान सिं श्रेष्ठ, रामप्रकाश श्रेष्ठ, राजन साङ्गचे, रितेश शाहीको सिर्जनाको सङ्गम यस प्रदर्शनी भदौ ४ गतेसम्म चल्ने छ ।
