कवि विनोदविक्रम केसीका कविताहरु र उनकै गीतहरुको प्रस्तुति सहित ‘सुसेला काव्यशाला’ कार्यक्रम सम्पन्न भएको छ । ‘सुसेला काव्यशाला – अ पोयट्री कन्सर्ट’ नाम दिइएको उक्त कार्यक्रम मण्डला थिएटर काठमाडौंमा भएको हो ।
‘आज सरको क्लास लिन्छ विद्यार्थी’, ‘अफ्ठ्यारो मान्छे’, ‘तपाईं सीसीटिभीको निगरानीमा हुनुहुन्छ’, ‘भूमण्डलीकरण’, ‘मृतक प्रेमीको फिराद’, ‘शुभकामनाः फोहोरको नयाँ प्रजाति’, लगायत विनोद विक्रमले आफ्ना १२ वटा छानिएका कविता सुनाए । केसीले कविता वाचन सुरु गर्नुअघि कवि विमल निभाले विनोद विक्रमको कविता ‘भोकको क्षेत्रफल’ वाचन गरे । कविता सुनाउनुअघि निभा बोले, ‘एउटा शब्द छ बागी । त्यही शब्द सापटी लिएर के भन्छु भने विनोदविक्रम केसी असली बागी हुन् ।’उनलाई कविता वाचनमा कवि विमल निभाका साथमा भूपाल राई र शान्तिप्रिय वन्दनाले साथ दिएका थिए ।
‘सुसेला सङ्गीत समूह’ले कार्यक्रममा कवि केसीका तीन वटा गीतको लाइभ प्रस्तुति दिएको थियो । ‘ए छोरी, लाइदे आलाराम’, ‘सडक बढार्ने केटी’ र ‘बाढी पैरो, दुःख गैरो’ गीतलाई कलाकारहरुले प्रस्तुत गरेका थिए । गायन र वाद्यवादनमा अन्जान बाबु, सानु तामाङ, विष्णु अधिकारी, स्यामुएल गन्धर्व, अजय नेपाली र अर्जुन क्षेत्रीलगायत थिए ।
‘यहाँ थुप्रै अग्रज राजनीतिकर्मीहरु देखिरहेको छु,’ कविता वाचनकै क्रममा कवि केसीले भने, ‘तपाईंहरुप्रति मेरो सम्मान छ, तर म आफ्नो हिस्साको राजनीति त कविताबाटै गरिरहेको छु । कविता नै मेरो राजनीतिक कर्म हो ।’ उनले ‘अफ्ठ्यारो मान्छे’ कविता वाचनसँगै कविता सुन्न आउने मान्छेहरु पनि आफूजस्तै कतै नमिल्ने अफ्ठ्यारै मान्छेहरु भएकाले यो जमघट सम्भव भएको सुनाए र आयोजकदेखि सहभागी श्रोता सबैलाई धन्यवाद दिए ।
सुसेलाका संयोजक अन्जान बाबुले आफूहरुले यसप्रकारको पहिलो कार्यक्रम गरेको र आगामी दिनमा काव्यशालालाई शृंखलाबद्ध अगाडि लैजाने बताए । उनले सुसेला सडक आन्दोलन र राजनीतिक–सांस्कृतिक अभियानहरुकै बीचबाट स्थापित भएको पनि सुनाए । ‘आगामी दिनमा हामी जनताका बीचमा, श्रमजीवीले काम गर्ने कारखाना र किसानहरुका श्रम गर्ने खेतबारीहरुमा सांस्कृतिक अभियानहरु लिएर जाने सोचेका छौं,’ उनले भने, ‘यसमा तपाईंहरुको साथ, सहयोग रहने विश्वास छ ।’ कार्यक्रमलाई नेपालखबर अनलाइनले लाइभ गरेको थियो ।
