वरिष्ठ संगीतकार रञ्जित गजमेरको आत्मकथा ‘मोहनी मादलको’ पुस्तक सार्वजनिक भएको छ ।सोमबार कमलादीस्थित नेपाल प्रज्ञा प्रतिष्ठानको डबलीमा गरिएको कार्यक्रममा दिवंगत मित्रहरु पिटर जे कार्थककी पत्नी रञ्जना कार्थक र नोर्बु योञ्जनकी छोरी सुजता योञ्जनले पुस्तकको लोकार्पण गरे । पुस्तक शेखर खरेलले लेखेका हुन् ।
नेपालमा संगीतयात्रा र संघर्षकका क्रममा आफ्ना मित्रहरु कार्थक र नोर्बुले गरेको सहायताको स्मरण गर्दै गजमेरले तिनै मित्रका परिवारजनमार्फत पुस्तक लोकार्पण गरेका हुन् ।
पुस्तकमा लेखक खरेलले गजमेरको दार्जीलिङ, काठमाडौं र मुम्बईसम्मको संगीतयात्रा तथा संघर्षलाई प्रस्तुत गरेका छन् । जहाँ गजमेरको दार्जीलिङस्थित बाल्यकाल, परिवार, नेपालमा वीरगन्जदेखि काठमाडौंसम्म तत्कालीन नेपाल एकेडेमी, रेडियो नेपाल, मुम्बई यात्रा, मादल र बाँसुरीको कथालाई निकै सुन्दर रूपमा उतारेका छन् । गजमेरको सांगीतिक यात्रा र साधना, उनका सिर्जनाहरूको मोहका कारण नै पुस्तक तयार भएको खरेलले बताए ।
नेपाली संगीतमा गजमेरसँगै सहकार्य गरेका स्रष्टाहरु नगेन्द्र थापा र दिनेश अधिकारीले गजमेरसँगैका सहयात्रा स्मरण गरे । नेपाली संगीतका सर्जकमाथि लेखिएका पुस्तक थोरै रहेकाले गजमेर रहेकै समयमा आएको पुस्तकमाथि थापाले खुसी साटे । स्रष्टा अधिकारीले गजमेर नेपाली गीतलाई नेपालीपन र शैली दिई लोकसंगीतमा जोड्ने फरक सर्जकका रूपमा लिए । उनले भने,‘रञ्जित दाइ अरुभन्दा फरक हुनुहुन्छ । यही फरकपनले उहाँलाई लामो आयु दिएको छ ।’ पुस्तकले गजमेरको संगीत सिर्जनाको आयु अझै लम्ब्याउने उनको ठहर छ ।
कार्यक्रममा गजमेरद्वारा संगीतबद्ध गीतहरु ‘झझल्को लिएर आएछ’, ‘मोहनी लाग्ला है’, ‘माया त माया हो’ लगायतका गीत युवा पुस्ताका सर्जकहरु शिला विष्ट, विपिन घिमिरे, बानिका प्रधान, कमल किरण, जिना रसाइलीलगायतले प्रस्तुत गरेका थिए ।
