नेपाल र भारतको कला, साहित्य, संस्कृति र सभ्यतामा केन्द्रित रहेर राजधानीस्थित होटल हिमालयमा दुईदिने कलिंगा साहित्य महोत्सव हुने भएको छ । बुधबार आयोजक समूहले होटल हिमालयमा पत्रकार सम्मेलन गर्दै साहित्य महोत्सवबारे जानकारी गराएको हो ।
यशस्वी फाउन्डेसन, हिमालयन डेरी प्रालि, राष्ट्रिय साहित्य प्रतिष्ठान र नेपाल कलिंगा लिटरेरी फेस्टिभल काठमाडौं संस्करणको सहकार्यमा असोज २९ र ३० गते हुने महोत्सवमा नेपाल र भारतका स्रष्टा र विशिष्ट व्यक्तिहरूबीच कला, साहित्य, संस्कृति तथा सभ्यतामा केन्द्रित रहेर बहस र छलफल हुनेछन् ।
आयोजकका अनुसार ‘भारत र नेपाल सभ्यताको यात्रा र आत्माको खोजी’ भन्ने मूल नाराका साथ हुने महोत्सवले नेपाल र भारतबीच रहँदै आएको साहित्य, कला सभ्यता र ऐतिहासिक सम्बन्धलाई अझै सुमधुर तथा प्रगाढ बनाउने विश्वास छ ।
महोत्सवमा भारतबाट चर्चित साहित्यकार अशोक बाजपेयी, बलिउड गायक, अभिनेता पियुष मिश्र, संगीतकार राज शेखरलगायत मालिनी अवस्थी, गीताञ्जली श्री, सुधीर चन्द्रजस्ता स्रष्टाहरू सहभागी हुनेछन् । नेपालतर्फबाट भने तुलसी दिवस, माया ठकुरी, दिनेश अधिकारी, अशेष मल्ल, भागिरथी श्रेष्ठ, कुमारी लामा, अर्चना थापा, राजकुमार बानियाँ, रामलाल जोशीलगायत व्यक्तित्वहरूको सहभागितामा कला, साहित्य, संस्कृति र ऐतिहासिक पक्षमा विभिन्न शीर्षकमा बहस र विमर्श हनेछ ।
दुई देशका गरी ४० जना स्रष्टाहरूको प्रस्तुति रहने उक्त महोत्सवमा तीन सयभन्दा बढी साहित्यकारहरुको सहभागिता रहने आयोजकले जनाएको छ । महोत्सवमा ‘हिजोको कथा/आजको कथा’, ‘आजको नेपाली समालोचना आवश्यकता र मूल्यांकन’, ‘मैथिली संस्कृतिका सिर्जनात्मक आयामहरू’, ‘आख्यानको अनुहारमा प्रतिविम्बित समय’ लगायत सेसनहरू प्रस्तुत हुनेछन् ।
