साहित्यिक पत्रकार संघको स्वर्ण महोत्सवको अवसर पारेर राधेश्याम लेकालीको अध्यक्षतामा संघको हालै बसेको कार्यसमितिले कविहरू उदय निरौला (२०७४), श्रवण मुकारुङ (२०७५), रमेश श्रेष्ठ (२०७६), कृसु क्षेत्री (२०७७), मोमिला जोशी (२०७८) र गीता कार्की (२०७९) लाई ‘व्यथित काव्य पुरस्कार’ द्वारा सम्मानित गर्ने निर्णय गरेको छ ।
कवि उदय निरौलाका ‘कोलाहल पिएर’, ‘जराहरु किमार्थ मर्दैनन्’, ‘शीतको लहर’, ‘उदय निरौलाका प्रतिनिधि कविताहरू’, ‘अस्ताउँदो घाम टेकेर’, कवि श्रवण मुकारुङका ‘देश खोज्दै जाँदा’, ‘जीवनको लय’, ‘बिसे नगर्चीको बयान’, ‘हिउँको दरबार’, ‘सुन रे सियाराम’ कविताकृतिहरु प्रकाशित छन् ।
यस्तै कवि रमेश श्रेष्ठका ‘चराहरूको पहाड’, ‘आमा नदीहरू’, ‘बुद्ध बिम्ब अक्षर बिम्ब’, ‘घाँस उखेलिरहेकी केटी’, ‘रोदी रोएको देशमा’, ‘कविताको उज्यालो’, ‘अग्निनृत्य’, ‘चोक र तमसुक, ‘नपोतिएका रंगहरु’, कवि कृसु क्षेत्रीका ‘बोधिसत्वको मृत्युउत्सव’, ‘चराको गीत’, ‘आगोको मूर्च्छना’, ‘रगतको दरबार’, ‘नीलो आँसु’, ‘अर्द्धमूदित आँखाहरू’, ‘माफ गर’ जस्ता कविता, गजल र गीतका कृतिहरु प्रकाशित छन् ।
यस्तै कवि मोमिला जोशीका ‘पैयु फूल्न थालेपछि’, ‘नीलो–नीलो आकाश र दुई थोपा आँसु’, ‘जूनकीरीहरु ओर्लिरहेछन’, ‘दुर्गम उचाइमा फूलको आँधी’, ‘भीमसेन थापाको सुसाइड नोट’ जस्ता कविताकृतिहरू प्रकाशित छन् भने कवि गीता कार्कीका ‘मलाई अँध्यारो नै चाहिन्छ’, ‘सालका ठुटा र एक टुक्रा घाम’ र ‘आमा किरणहरुको छालमा’ जस्ता कविताकृतिहरू प्रकाशित छन् ।
साहित्यिक पत्रकार संघबाट विसं २०३९ मा स्थापित व्यथित काव्य पुरस्कार नेपाली साहित्य जगत्का सुपरिचित कविलाई प्रदान गरिन्छ । यस पुरस्कारबाट यसअघि कविहरू दिनेश अधिकारी, जीवन आचार्य, घनश्याम कँडेल, मञ्जुल, उषा शेरचन, गणेश विषम, तोया गुरुङ, प्रमोद प्रधान, पूर्ण विराम, विजय बजिमय, मञ्जु काँचुली, नरेन्द्रबहादुर श्रेष्ठ, कुन्ता शर्मा, बुँद राना, नवराज कार्की, विश्वविमोहन श्रेष्ठ, कृष्ण बाउसे, दुबसु क्षेत्री, मोहन दुवाल, कृष्ण जोशी, डा. राममान तृषित, विमल निभा आदि सम्मानित भइसक्नु भएको छ ।
