गोपाल योञ्जनले रचना गरेका २ सयभन्दा बढी गीतहरूको संग्रह ‘गोपालय : गोपालका गीतहरू’ पुस्तक शनिबार सार्वजनिक गरिएको छ ।कार्यक्रममा गोपाल योञ्जनको गीत ‘हर नाद’को गीत समेत सार्वजनिक गरियो । गीतमा उनकी नातिनी नवश्रीको स्वर समेटिएको छ ।
गोपाल योञ्जनलाई संगीत तथा गायनमा बढी चिनाएकोमा रचनाकारका रूपमा अझै उभ्याउन अहिले उनका गीतहरुलाई मात्र पुस्तकमा समेटिएका छन् । योञ्जनद्वारा स्वर तथा संगीतबद्ध गीतहरु पुस्तकमा छैनन् । परिवारका अनुसार ती गीतहरुलाई खोजी बाँकी छन् । गोपालका यी गीतहरु अहिलेको युग र युवाका लागि रहेको रिन्छिन योञ्जनले बताइन् । गोपाल योञ्जनको परिवारले प्रतिष्ठान बनाएन भन्ने आम मानिसको धारणा रहेको सुनाउँदै उनले अहिलेसम्म परिवार योञ्जनका गीतहरु सङ्ग्रहमा नै निरन्तरता दिइरहेको सुनाइन् । ‘गोपालको दार्जिलिङमा प्रतीमा बनेको छ । धेरैले मलाई गोपालको नाममा प्रतिष्ठान खोल्ने कुरा गरे तर हामी मानेनौँ । प्रतिष्ठान खोल्न सजिलो छ । एक वर्षमा एकचोटी कार्यक्रम गरेर कसैलाई ठूला बनाउन मन लागेन,’रिन्छिनले सुनाइन् ।
कार्यक्रममा हर नादसँगै मेरी माया, कठिन समयमा, बदलिँदो आकाश, म त तिम्रो घनश्याम, हिमाल सरी म, रात नयाँ, देशले रगत मागे, बनेको छ पहराले गीतहरुको प्रस्तुति भयो । पुस्तक केही फरक शैलीमा विमेचन गरियो । पुस्तकलाई बाल गायक/गायिका नवश्री, अरुण सुनार, अभिज्ञा घिमिरे, अदित्य विश्वकर्माले विमोचन गरे ।
