पारिजात स्मृति केन्द्रले प्रसिद्ध साहित्यकार पारिजातको २९ औं स्मृति सभामा विभिन्न क्षेत्रका चार स्रष्टालाई पारिजात स्मृति सम्मान दिइएको छ । पारिजात स्मृति केन्द्र परिसर म्हेपी नयाँ बजारमा आयोजित कार्यक्रम पारिजात स्मृति केन्द्रका उपाध्यक्ष इन्दिरा डलील सभापतित्वमा सम्पन्न भएको थियो । अध्यक्ष स्नेह सायमी स्वास्थ्य उपचार को क्रममा भारतको मेडान्त रहनु भएकोले सभाको अध्यक्षता उपाध्यक्ष इन्दिरा डलीले गर्नु भएको थियो ।
म्हैपीस्थित कार्यालय परिसरमा भएको कार्यक्रमको प्रमुख अतिथि वरिष्ठ समालोचक डि. आर. पोखरेल हुनुहुन्थ्यो । २०७८ का लागि पारिजात सिर्जन सम्मान कवि विनोदविक्रम केसी, पारिजात बालसाहित्य सम्मान बाल साहित्यकार भिक्टर प्रधान, पारिजात कला सम्मान कलाकार देवेन्द्र थुम्केली, पारिजात संघर्षशील नारी सम्मान उमा गुरुंग राईलाई प्रदान गरियो ।
कार्यक्रममा सम्मानित प्रतिभाहरु भिक्टर प्रधान, विनोद विक्रम केसी, देवेन्द्र थुम्केली, उमा गुरुंग राइ, महेश मास्के, संरक्षक सुकन्या वाईबा, कोषाध्यक्ष दिलसुन्दर श्रेष्ठ, बिन्दु शर्मा र इन्दिरा डलीले पारीजात र पारीजात स्मृति केन्द्रको विषयमा मन्तव्य दिनुभएको थियो ।
१९९४ सालमा दार्जिलिङको चिया कमानमा जन्मिएकी पारिजातको वास्तविक नाम विष्णु कुमारी वाइबा हो। नेपाली साहित्यका सुप्रसिद्ध नामको रुपमा स्थापित उनी बहुमुखी प्रतिभा सम्पन्न शिखर नारी हस्ताक्षर समेत हुन्।
सुरुमा विसंगतिवादी र पछि प्रगतिवादी कला चेतनाद्वारा नेपाली साहित्यलाई अतुलनीय योगदान दिने पारिजातको २०५० सालमा निधन भएको थियो। उनैको नामबाट स्थापित पारिजात स्मृति केन्द्रले प्रत्येक वर्ष विशिष्ट योगदान दिने व्यक्तिहरुलाई सम्मान प्रदान गर्दै आएको छ।
