साइनो नेपाली मनमाटाको नयाँ शैलीको कविता हो । यो क्रमश: सात,आठ, नौ अक्षरका तीन पङ्क्तिको चौबिस अक्षरी पूर्ण संरचना हो ।
यी तीन पङ्क्ति तराई ,पहाड ,हिमालका प्रतीक हुन् । सात अक्षर सातवार, आठ अक्षर आठ दिशा र नौ अक्षर नवरसका सूचक हुन् । साइनो पूर्णरूपले नेपाली संस्कृति झल्काउने मौलिक कविता हो । यसको थालनी नेपाली भाषामा नेपालबाट २०७६/०४/१६ मा भएको हो । अहिले साइनो विश्वका ८/१० भाषामा ४२०० स्रष्टाले लेखिरहेका छन् । यो छोटो अवधिमा थुप्रै छापा र अनलाइन पत्रपत्रिकाले छापिरहेका छन् भने निजी र सामूहिक गरी १०वटा पुस्तक प्रकाशित भइसकेका छन् । हेरौं केही रचनाहरू :
१
नीरले खोज्छ चर
जुटले बन्छ नि घर
गुट–फुट भो डरै डर !
२.
गर्नुपर्ने हो काम
गरे प्रशस्त भाषण
बाल्छु भन्थे निभाए बत्ती !
३.
कर लियो घँसियो
देश आश्रित बनायो
इतिहास च्यात्यो रमायो !
४.
सिङ नाप्दैन ज्ञान
पिङ छुँदैन आकाश
रङ पछ्याउँछ प्रकाश !
५.
गजब छ प्रवृत्ति
आमा ढाँटे नि सजिलै
स्वघोषित बहादुर म ?
६.
खोजौं मिलन विन्दु
भत्काऊँ स्वार्थी पर्खाल
जुटे पो बन्छ नि नेपाल !
७.
बिर्से उज्यालो बाल्न
अँध्यारै छ रमाइलो
मुस्कुराउँछ व्यक्तिवाद !
८.
नफक्रेको विवेक
अस्तव्यस्त गतिविधि
स्वार्थी खेल घाइते देश !
९.
बलशाली समय
विलासप्रेमी नेतृत्व
चेतना खुम्च्याए जनता ?
१०.
दोषी छ रे समय
दिनहुँ फेरिन्छ मान्छे
हेरौं आफ्नै जीवन शैली !
११.
लागिरहन्छ भोक
थुप्रो छ निजी चाहको
खै कता छ कर्तव्यबोध ?
१२.
फक्र्याे सिर्जना थुँगा
नेपाली नवपालुवा
नयाँ यत्न नयाँ छ चेत !
१३.
पर पुग्यो गन्तव्य
कठिन बन्दै छ यात्रा
नथाकी हिँडौं हामीसँगै !
