नेपाली साहित्यकार विश्व सञ्जालले आइतवार जुम कार्यक्रमार्फत दर्जन बढी साहित्यकारलाई सम्मान गरेको छ । गुरु पूर्णिमा तथा २१० औँ भानुजयन्तीको अवसर पारेर प्रा. डा. रामप्रसाद ज्ञवालीको प्रमुख आतिथ्यमा चार वर्षअघिदेखि निरन्तर नेपाली साहित्यकार विश्व सञ्जाल पाठशालामा प्रशिक्षण दिइरहनु भएका दर्जन बढी अग्रज प्रशिक्षक, प्रशिक्षण सहयोगी तथा समायोजन सहयोगीलाई सम्मान गरेको हो ।
सञ्जालले सोमबारका गजल प्रशिक्षक गजलविद्वोच्छिरोमणि तथा वर्दघाट नगर प्रज्ञा परिषद् कुलपति डा. घनश्याम न्यौपाने परिश्रमीलाई ‘मोतिराम भट्ट सम्मान-२०८०’, मङ्गलवारका गद्य कविता प्रशिक्षक वरिष्ठ साहित्यकार कलानिधि दाहाललाई ‘गोपालप्रसाद रिमाल सम्मान -२०८०’ तथा बुधवारका मुक्तक प्रशिक्षक अग्रज मुक्तककार सुनिल अधिकारीलाई ‘गुमानी पन्त सम्मान -२०८०’ गरेको छ ।
बुधवारकै खोरिया प्रशिक्षक अग्रज साहित्यकार जनार्दन अधिकारी धड्कनलाई ‘खोरिया प्रविधा प्रणयन सम्मान-२०८०’, बिहिवारका छन्द कविता प्रशिक्षक अग्रज साहित्यकार हरिप्रसाद रिमाललाई ‘भानुभक्त आचार्य सम्मान -२०८०’ र अर्का प्रशिक्षक अग्रज साहित्यकार विदुर अधिकारीलाई ‘लेखनाथ पौडेल सम्मान -२०८०’ प्रदान गरेको छ ।
त्यसैगरि शुक्रवारका गीत प्रशिक्षक वरिष्ठ गीतकार ज्ञानेन्द्र गदाललाई ‘हरिभक्त कटुवाल सम्मान -२०८०’, शनिवारका हाइकु प्रशिक्षक अग्रज हाइजिन पुरु सुवेदीलाई ‘शंकर कोइराला सम्मान -२०८०’, शनिवारका अग्रज लघुकथा प्रशिक्षक राजन सिलवाललाई ‘पूर्णप्रसाद ब्राह्मण सम्मान-२०८०’, आइतवारका बाछिटा प्रशिक्षक अग्रज साहित्यकार अमर त्यागीलाई ‘बाछिटा प्रविधा प्रवर्तन सम्मान -२०८०’ र आइतवारकै चारु प्रशिक्षक अग्रज गजल चिन्तक तथा साहित्यकार डा. देवी पन्थीलाई ‘चारु प्रणयन सम्मान -२०८०’ ले सम्मान गरेको हो ।
सोमबारका गजल प्रशिक्षण सहयोगी सक्रिय साहित्यकार दुर्गा क्षेत्रीलाई ‘भीमनिधि तिवारी सम्मान-२०८०’ प्रदान गरेको छ । यसैगरी, नेपाली साहित्यकार विश्व सञ्जाल पाठशालामा अभ्यास समायोज सहयोगीको भूमिका निर्वाह गर्दै आएका नेपाल प्रतिनिधि साहित्यकार कमला महत, साहित्यकार ताराप्रसाद चापागाईँ र साहित्यकार निरु गौतमलाई ‘वाङ्मय श्रीवृद्धि सम्मान -२०८०’ ले सम्मान गरेको छ।
कार्यक्रमका प्रमुख अतिथि वरिष्ठ साहित्यकार प्रा.डा. रामप्रसाद ज्ञावालीले कविता के हो र कस्ता रचनालाई कविता भन्ने भनेर मार्गदर्शन गराउनुभयो । उहाँले संस्थाका परिकल्पनाकार स्पन्दन विनोदको मुक्तकण्ठबाट प्रशंसा गर्नुभयो ।
