कवि किसनसिंह धामीको अंग्रेजी कविता संग्रह ‘एटलान्टिक’ अमेरिकी प्रकाशन गृह एमेजनबाट प्रकाशित भएको छ । कवि धामीको कृतिको हालै काठमाडौंमा विमोचन भएको छ ।
एक दशकयता अमेरिका बस्दै आएका कवि धामीको यसअघि प्रकाशित ‘एटलान्टिकका भागालाहरू’को अंग्रेजी अनुवाद ‘एटलान्टिक’ एमेजनबाट आएको हो । भौतिक विकासको चरमोत्कर्षमा पुगेको अमेरिकाको बासिन्दा भएर दार्चुलाको सामाजिक-सांस्कृतिक र आर्थिक चित्रचरित्र उधिन्दै धामीले लेखेको लामा कविताको संकलनलाई प्राध्यापक राजन थपलियाले अंग्रेजीमा अनुवाद गरेका हुन् ।
‘नेपाली कवि र कविताको अंग्रेजी अनुवाद एमेजनबाट प्रकाशनमा आउनु सुखद् कुरा हो,’ कृतिको विमोचन गर्दै साहित्यकार ध्रुबचन्द्र गौतमले भने‚
‘धामीका कवितामा दुई भूगोलबीचको अन्तर र जीवनजगतका सूक्ष्म लाग्ने आप्रवासी चेतनाका विषय समेटिएका छन् ।’
हाल अमेरिकाको इन्डियानास्थित ट्रिने युनिभर्सिटीमा प्राध्यापनरत थपलियाले अनुवाद गरेको कविताको अंग्रेजीका प्राध्यापक तथा सम्पादक निस्बत शा र जेम्स क्रिस्टोफरले सम्पादन गरेका छन् । नेपाली सांस्कृतिक र साहित्यिक सम्पदालाई समेत तुलनात्मक अर्थमा बाहिरी जगतमा चिनारी गराउने अर्थमा आफूले ‘एटलान्टिकका भागालाहरू’ लेखेको कवि धामीले बताए ।
कवि किसनसिंह धामीको ‘एटलान्टिक’ प्रकाशित
