पठन संस्कृतिको विस्तारका लागि काम गर्दै आएको बुकाहोलिक्सले ‘मासिक चकटी बहस’को ९५औँ शृंखलामा साहित्यकार पद्मावती सिंहको कथाकृति ‘पद्मावती सिंहका प्रतिनिधि कथाहरू’ माथि बहस गराएको छ ।
उक्त बहस कार्यक्रममा वक्ता साहित्यकार अनिता पन्थीले कृतिमाथि आफ्नो दृष्टिकोण राखिन् । समीक्षक पन्थीले पद्मावती सिंहका कथाहरूमा विविध पाटाहरू रहेको बताइन् ।
पन्थीले कृतिभित्रका २२ कथामाथि टिप्पणी गर्दै पद्मावती सिंहका कथामा संस्कृति, सभ्यताका साथै यौन मनोविज्ञान पनि प्रस्तुत भएको बताइन् । उनले कथाकार सिंहका यौन कथामा कलात्मकता प्रचुर रहेको बताइन् । पन्थीले भनिन्, “यौन कथा लेख्न कलात्मक सोच चाहिन्छ । कलाले अश्लीलता छोपिन्छ ।”
पन्थीले कथाकृतिभित्रका कमी कमजोरीहरूको पनि चर्चा गरिन् । कथाकार सिंहले आफूले कथा लेख्दा कल्पनाको उडान खासै नगरेको बताउँदै आफूलाई छोएको विषयलाई कथाशिल्पमा उन्दै आएको बताइन् ।
उक्त अवसरमा केही प्रश्न उठे, जसको जवाफ वक्ता र लेखक दुवैले दिए । बुकाहोलिक्सकी संयोजक साहित्यकार सगुना शाहले संस्थाको बारेमा जानकारी दिँदै कथा लेखनका सन्दर्भमा आफ्नो विचार राखिन् । उनले सन् २०१३ देखि बुकाहोलिक्सले काम गर्दै आएको बताइन् ।
