कर्णाली क्षेत्रमा बालरोग विशेषज्ञका रूपमा कार्यरत चिकित्सक डा. नवराज केसीद्वारा लिखित सिर्जनात्मक गैरआख्यान ‘शून्यको मूल्य’ एक समारोहका बीच लोकार्पण भएको छ ।
शनिबार काठमाडौंमा आयोजित कार्यक्रममा पूर्वप्रधानमन्त्री डा. बाबुराम भट्टराई, डा. रिता थापा, डा. अरुणा उप्रेती, सुरक्षा पन्तका साथै लेखक स्वयंले कृति सार्वजनिक गरे ।
विमोचनपछि लोकार्पित पुस्तकबारे पठन अनुभव सुनाउँदै डा. बाबुराम भट्टराईले पढ्न मनपराउने भन्दै आफ्नो रुचिको विषय गैरआख्यान भएको उल्लेख गरे । उनले आफूले पनि केही लेख्न चाहेको इच्छा व्यक्त गरे ।
“यो पुस्तक मार्मिक छ । यसमा कर्णाली क्षेत्रका विभिन्न पाटाहरू उल्लेख छन् । म पनि केही लेख्न चाहन्छु,” भट्टराईले भने, “मेरो पनि कृति आओस् भन्ने चाहना छ । चुनावी राजनीतिबाट अलग हुने एउटा कारण यो पनि हो । यद्यपि, लेखेर पुस्तकका रूपमा आउन समय लाग्छ होला ।”
डा. भट्टराईले पुस्तकभित्रका केही प्रसंग उल्लेख गर्दै कृतिबाट आफू प्रभावित भएको बताए । कार्यक्रममा डा. अरुणा उप्रेतीले पुस्तक पढेपछि आफूलाई ईष्र्या लागेको बताउँदै डा. केसीजस्तै आफूले किन लेख्न नसकेको होला भन्ने बताइन् । उनले यस कृतिको शीर्षक कर्णालीको कहाली राखेको भए पनि हुन्थ्यो भन्दै कर्णाली गरिब होइन, कर्णालीलाई गरिब बनाइएको तर्क गरिन् ।
कार्यक्रममा डा. रिता थापा र सुरक्षा पन्तले पनि कृति पठनको अनुभव सुनाएका थिए । सास, साहस र स्नेहको कथा ‘शून्यको मूल्य’ साङ्ग्रिला बुक्सले प्रकाशनमा ल्याएको हो ।
