यस वर्षको सयपत्री राष्ट्रिय सम्मान वरिष्ठ साहित्यकार प्रा.डा.अभि सुवेदी र साहित्यकार राम सुन्दर देउजालाई प्रदान गरिने सयपत्री प्रतिष्ठान नेपाल जनागालका अध्यक्ष राजेन्द्र श्रेष्ठले जानकारी दिनु भएको छ । वरिष्ठ साहित्यकार एवं प्रतिष्ठानका सल्लाहकार मोहन दुवालको संयोजकत्वमा गठित स्रष्टा छनौट समितिले राष्ट्रिय स्तरबाट डा. सुवेदी र काभ्रेबाट देउजाको नाम सिफारिस गरेकोलाई प्रतिष्ठानको बैठकले अनुमोदन गरेको थियो । सयपत्री प्रतिष्ठानले महाकवि लक्ष्मीप्रसाद देवकोटाको जन्म जयन्तिको अवसरमा विगत २०५५ सालदेखि बर्सेनि जनागालमा साहित्यिक कार्यक्रम गरी राष्ट्रिय स्तरका एक र काभ्रेली साहित्यकार एक जोडीलाई दम्पती सहित सयपत्री राष्ट्रिय सम्मानद्वारा सम्मानित गर्दै आएको छ ।
यस वर्ष आगामी कार्तिक २५ गते शनिवार महाकवि लक्ष्मीप्रसाद देवकोटाको ११५औँ जन्म जयन्तिको अवसरमा डा. सुवेदीलाई उहाँकी जीवन संगिनी विन्दु सुवेदी र साहित्यकार देउजालाई उहाँकी जीवन संगिनी सावित्री देउजाका साथ सयपत्री राष्ट्रिय सम्मान २०८० द्वारा सम्मानित गरिनेछ । सयपत्री सम्मानमा सम्मानित जोडीलाई सम्मान पत्र, सयपत्रीको माला, दुवोको माला, दोसल्ला, र बाटो खर्च पाँच हजार एक नगद रहेको छ । कार्यक्रममा देशका विभिन्न क्षेत्रका र जिल्लाका स्रष्टाहरूको कविता वाचन हुने समेत अध्यक्ष श्रेष्ठले जानकारी दिनु भएको छ ।
प्रतिष्ठानले राष्ट्रकवि माधव घिमिरे, कृष्णचन्द्र सिंह प्रधान, रमेश विकल, चित्तरन्जन नेपाली, माधवलाल कर्माचार्य, शेषराज सिवाकोटी, मोहन दुवाल, तुलसी दिवस, मञ्जुल, डा. खगेन्द्र लुइँटेल, मोदनाथ प्रश्रित, डा.रामप्रसाद ज्ञवाली, अर्जुन पराजुली, डा. सुरेशराज शर्मा, ज्ञानकाजी मानन्धरको दम्पती सहित ६६ जनालाई सयपत्री राष्ट्रिय सम्मानबाट सम्मानित गरिसकेको छ ।
