नोबेल पुरस्कार विजेता लेखक एलिस मुनरोको निधन भएको छ । कथ्य-शैलीका कारण ‘द क्यानडियन चेखब’ का रूपमा समेत परिचित मुनरोको मंगलबार निधन भएको हो । उनी ९२ वर्षकी थिइन् । केही वर्षदेखि उनी ‘डिमेन्सिया’बाट ग्रसित थिइन् ।
मुनरोलाई सन् २०१३ मा साहित्यतर्फको नोबेल साहित्य पुरस्कार दिइएको थियो । नोबेल कमिटीले मुनरोलाई ‘समकालीन कथाकी कुशल कालिगढ’ को संज्ञासमेत दिएको थियो । चर्चित क्यानडेली साहित्यकार मार्गरेट एटवुडलेले मुनरोलाई ‘समकालीन अंग्रेजी कथामा प्रमुख लेखकमध्येकी एक’ भनेकी थिइन् ।
मुनरोको जन्म सन् १९३१ मा ओन्टारियोको किसान परिवारमा भएको थियो । उनी सानैदेखि साहित्यप्रति रूचि राख्थिन् । एकपल्ट उनले गार्डियनसँग भनेकी थिइन्, ‘पुस्तक मेरा लागि जादुजस्तै थिए । र, म त्यो जादुको हिस्सा बन्न चाहन्थेँ ।’
मुनरोको निधनमा क्यानडाका प्रधानमन्त्री जस्टिन ट्रुडोले दु:ख व्यक्त गरेका छन् । प्रधानमन्त्रीले शोक वक्तव्य जारी गर्दै ‘एक साहित्यिक हस्ती’ गुमाएको जनाएका छन् । प्रधानमन्त्री ट्रुडोले भनेका छन्, ‘एलिस मुनरो विश्वकै महान कथाकारमध्येकी एक हुन् । जीवन, मित्रता र मानवीय सम्बन्धका बारेमा उनका कथाहरू पाठकमा अमिट छाप छाडेका छन् ।’
एलिस मुनरोका ‘डियर लाइफ’, ‘रनअवे’, ‘लाइभ्स अफ गर्ल्स एन्ड वुमेन’ लगायतका चर्चित पुस्तक छन् ।
