सिरिजंगा लिपिका प्रवर्द्धक सिरिजंगा सिङथेवे, महागुरु फाल्गुनन्द र इतिहासकार इमानसिं चेम्जोङका बारेमा लेखिएको ‘सिरिजंगा, फाल्गुनन्द र इमानसिं चेम्जोङका लेखोट’ पुस्तक सिक्किमको विश्वविद्यालयमा पठनपाठन हुने भएको छ । उक्त पुस्तक इतिहासकार अर्जुनबाबु माबुहाङ र अमित थेवेले लेखेका हुन् भने सिद्धकुमारी थेवेले प्रकाशित गरेकी हुन् ।
लेखकद्वयको पुस्तक सिक्किमको अल्पाइन विश्वविद्यालयमा स्नातक तहमा अध्ययन हुन लागेको उपकुपति डा. आरके थापाले बताएका छन् । विश्वविद्यालयका तर्फबाट लेखकद्धय र प्रकाशकलाई औपचारिक पत्र दिदै उपकुलपति डा. थापाले याक्थुङ भाषा, लिपि र इतिहासका बारेमा थोरैमात्र पाठ्यपुस्तक रहेको बेला यो पुस्तकले विद्यार्थी र शोध–अनुसन्धानकर्मीलाई वास्तविक तथ्यसहित राहत दिएको बताएका छन् ।
तेह्रथुमको लालीगुराँस नगरपालिकाका प्रमुख समेत रहेका माबुहाङले पुस्तकले नेपाल हुदै सिक्किमसम्म बहस सुरु गरेको र पाठ्य सामाग्रीका रुपमा अध्यययन हुने कुराले उत्साहित भएको बताए । उनले भने, ‘सिक्कम विश्वविद्यालयको स्नातक तहको याक्थुङ (लिम्बु) भाषा र सिरिजंगा लिपिको विकासक्रमसँगै लिपि प्रचारक सिरिजंगा सिङ थेवे, सत्यधर्म पन्थी (किरात) महागुरु फाल्गुनन्द (फलामसिं लिङ्देन) र इतिहासकार इमानसिं चेम्जोङको योगदानको अध्ययनका लागि स्रोत पुस्तकका रूपमा हाम्रो पुस्तक पठनपाठन हुने कुराले खुसी लागेको छ ।’
याक्थुङ (लिम्बू) भाषा साहित्य र सिरिजंगा लिपिको अध्ययन अध्यापनमा सिक्किम नमुना राज्य मानिन्छ । सिक्किममा गत वर्षदेखि विद्यावारिधी (पीएचडी) तहसम्ममा याक्थुङ (लिम्बू) भाषा साहित्यको अध्ययन अध्यापन सुरु भएको छ । सन् १९७५ बाट सिक्किमले स्थानीय विद्यालयहरूमा रैथाने समुदायको भाषाका हिसाबले याक्थुङ (लिम्बू) भाषा पढाउन थालेको थियो ।
