नेपाली कलासाहित्य डट कम प्रतिष्ठानले यस वर्षको सम्मान घोषणा गरेको छ । अमूल्य ‘राष्ट्रिय कलाश्री सम्मान-२०७८’ विशिष्ट साहित्यसाधक परशु प्रधानलाई प्रदान गर्ने निर्णय गरिएको छ । यस्तै प्रतिष्ठानले रु. १,००,०००।-राशिसहितको ‘राष्ट्रिय कलाश्री पुरस्कार- २०७८’ साहित्यकार मञ्जु काँचुलीलाई र रु. ७५,०००।-राशि सहितको ‘ससिद्धि राष्ट्रिय कलाश्री युवा पुरस्कार -२०७८ ‘ स्रष्टा एवम् अनुवादक केशव सिग्देललाई प्रदान गर्ने निर्णय गरेको छ ।
यसैगरी प्रतिष्ठानले रु. ५०,०००।- राशि सहितको ‘बद्रि राष्ट्रिय कलाश्री पत्रकारिता पुरस्कार-२०७८’ साहित्यिक पत्रकार एबम् स्रष्टा धीरेन्द्र प्रेमर्षिलाई , रु. ६०,०००।-राशि सहितको ‘थिरछाया राष्ट्रिय कलाश्री ललितकला पुरस्कार-२०७८’ ललितकलाका साधक एवम् मूर्तिकार ओम के.सीलाई र रु. ५०,०००।-राशिसहितको ‘पद्मनेत्र राष्ट्रिय कलाश्री सङ्गीत पुरस्कार-२०७८’ लोकप्रिय गायक शिव परियारलाई प्रदान गर्ने निर्णय गरेको प्रतिष्ठानका अध्यक्ष साहित्यकार मोमिलाद्वारा जारी विज्ञप्ति मार्फत जानकारी गराएको छ ।
प्रतिष्ठानका अध्यक्ष मोमिलाको अध्यक्षतामा बसेको कार्य समितिको बैठकले उक्त निर्णय गरेको हो । यी सम्मान तथा पुरस्कार अगामी यही चैत्र महिनामा सम्पन्न हुने विशेष समारोहका बीच प्रदान गरिने विज्ञप्तिमा उल्लेख गरिएको छ ।
राष्ट्रको साझा सवाल र गौरव नेपाली कला, साहित्य, सङ्गीत, संस्कृति, दर्शन, इतिहास एवम् विविध क्षेत्रमा सम्मान तथा पुरस्कार स्थापन, अध्ययन अनुसन्धान, प्रकाशन, सम्मेलन, भ्रमण, विमर्श, गोष्ठी आदिको व्यवस्था गरी सो क्षेत्रको उत्थानमा समर्पित रहेर नेपाली उत्कृष्ट साहित्यलाई विश्व परिवेशमा परिचित गराउन प्रतिष्ठान विगत चौध वर्षदेखि समर्पित रहेको छ ।
