विश्वप्रसिद्ध अमेरिकी कथाकार ओ. हेनरीको खास नाम विलियम सिड्नी पोर्टर हो । उनको जन्म ११ सेप्टेम्बर १८६२ मा नर्थ क्यारोलिनाको ग्रीन्सबोरो शहरमा भएको थियो । विलियम सिड्नी पोर्टर, चिकित्सक अल्गेन सिड्नी पोर्टर र म्यारी जेन भर्जिनिया स्वाइम पोर्टरका तेस्रो सन्तान थिए । विलियम तीन वर्षका हुँदा उनकी आमाको देहान्त भएपछि बाबुले उनलाई हजुर आमाको घर पुर्याएका थिए । पढ्न सक्ने भएपछि विलियम परम्परागत शास्त्रीय पुस्तकदेखि उपन्यास लगायत सबैखाले पुस्तकहरु पढ्थे ।
विलियमले सन् १८७६ मा आफ्नै काकीको एभेलिना मारिआ पोर्टर स्कुलबाट प्राथमिक तहको शिक्षा प्राप्त गरेका थिए । त्यसपछि काकीकै रेखदेखमा उनी लिन्डसी स्ट्रीट हाईस्कुलमा भर्ना भए । उनी १५ वर्षका हुन्जेल काकीले उनलाई ट्युशन पढाउँथिन् । सत्र वर्षका भएपछि सन् १८७९ मा उनी ग्रीन्सबोरो स्थित काकाको औषधी पसलमा काम गर्न लागे । ३० अगस्त १८८१ देखि १९ वर्षको उमेरमा उनले फर्मासिस्टको प्रमाणपत्र लिए र आफ्नै औषधी पसल सञ्चालन गर्न लागे ।
सन् १८८२ मा उनी टेक्सास गए । त्यहाँ उनी एउटा गाई गोठमा काम गर्न थाले । त्यसपछि उनी अस्टिन स्थित फस्र्ट नेशनल बैङ्कमा टेलर (Teller)को काम गर्न थाले । सन् १८८७ देखि उनले अथोल एस्ते रोचसँगको आफ्नो विवाहको सम्झनामा संक्षिप्त हास्यप्रधान चित्रणहरु लेख्न थाले । सन् १८९४ मा उनले एउटा हाँस्यप्रधान साप्ताहिक द रोल्लिङ् स्टोन चलाए । त्यसमा असफल भएपछि उनी हस्टन पोष्ट नाउँको पत्रिकामा पत्रकार, स्तम्भकार र कार्टुनिष्टको रुपमा काम गर्न लागे । फेब्रुअरी १८९६ मा उनलाई बैङ्कको रकम हिनामिना गरेको अभियोग लाग्यो । उनका साथीहरुले उनलाई त्यहाँबाट होन्डुरसतर्फ भगाए । श्रीमती क्षयरोगबाट सिकिस्त विमारी भई अन्तिम अवस्थामा पुगेको खबर पाएपछि उनी फेरि अस्टिन फर्के । अन्त्यमा उनकी श्रीमतीको देहान्त भयो ।
बैङ्कले पनि उनको सम्वेदनशील अवस्थालाई ध्यानमा राखी उनकी श्रीमती बाँचुन्जेल उनलाई कुनै कारवाही गरेन । अपराधी साबित भएपछि उनलाई पाँच वर्षको काराबासको सजाय तोकिएता पनि राम्रो व्यवहार देखाए बापत उनलाई न्यूनतम तीन वर्ष र तीन महिनाको कैद सजाय सुनाइयो र सन् १८९८ मा ओहियोको कोलम्बसस्थित जेलमा उनी कोचिए । औषधी पसल सञ्चालन गर्दाको अनुभवको आधारमा उनले जेलभित्रका बिमारीहरुलाई रात्री स्वास्थ्य सेवा प्रदान गरे । यसबाट उनले केही आय आर्जन गर्न थाले । त्यस आम्दानीबाट उनले आफ्नी छोरी मार्गरेटलाई जीवन निर्वाह गर्न सहयोग पुर्याए । मध्य तथा दक्षिण–पश्चिम अमेरिकाका उनका साहसका कथाहरु पत्रिकामा छापिन थालेपछि उनी जनप्रिय हुन थाले । त्यसपछि बैङ्कको रकम हिनामिना सम्बन्धी आरोेपको सजाय काटेर जेलबाट निस्कने बित्तिकै विलियम सिड्नी पोर्टर, ओ. हेनरी भएका थिए । कथाकार ओ. हेनरीको नाउँबाट आज उनी विश्वभर प्रख्यात छन् ।
पोर्टरका कथाहरुको तुलना गोगोल, किप्लिङ्, मार्क ट्वाइन र मोपासाँ जस्ता विश्वप्रसिद्ध कथाकारहरुसँग हुन थाल्यो । ब्यङ्ग्यात्मक शैली र कथाको अनपेक्षित (Surprise) अन्त्य गर्न सक्ने विशिष्ट क्षमताले गर्दा उनी प्रसिद्ध भए । न्यु योर्कका गल्लीहरुमा बरालिँदै उनले समय काटे । यसै शहरभित्र उनले प्रहरी, होटलमा काम गर्ने वेट्रेस र तल्लोस्तरमा काम गर्ने सर्वसाधारण पात्रहरु फेला पार्थे, यिनै सर्वसाधारणका दैनिकी नै उनका कथाका सामग्री हुन् । घटना वा परिस्थितिको अपूर्व संयोग, सुन्दर वाक्य रचना र विशिष्ट शैलीमा हाँस्यपूर्ण र ब्यङ्ग्यात्मक चित्रण गर्नसक्ने अपूर्व गुण उनमा थियो ।
सन् १९०७ मा उनले ग्रीन्सबोरो स्थित बाल्यकालकी प्रेमिका सारा लिन्डसे कोलम्यानसँग विवाह गरे । दोस्रो विवाह गरेता पनि उनले जीवनमा कहिल्यै परिवर्तनको अनुभव गर्न सकेनन् । पोर्टरको अत्यन्त खर्चिलो जीवनशैलीको कारणले साराले सन् १९०९ मा उनलाई छाडिन् । उनका केही प्रमुख कथा सङ्ग्रहहरु यी हुन् :–
१. बन्दकोबी र राजाहरु (Cabbages and the Kings, 1904), २. पश्चिमको मुटु (Heart of the West, 1907), ३. चालिस लाख(The Four Million, 1909), , ४. विकल्पहरु (Options, 1909), ५. भाग्यको बाटो (Roads of Destiny, 1909), ६. व्यवस्थित बत्ती(The Trimmed Lamp, 1910), ७. असाध्य व्यावसायिक : चालिस लाखका अरु कथाहरु (Strictly Business : More Stories of the Four Million, 1910), ८. चक्करहरु (Whirligigs, 1910), ९. छ र सातहरु (Sixes and Sevens, 1911), , १०. भद्र घुस्याहा (The Gentle Grafter, 1919) र ११.गुड्ने ढुङ्गाहरु (Rolling Stones, 1919) ।
संयुक्त राज्य अमेरिकाको न्यु योर्क शहरमा कलेजोको पुरानो रोग बल्झी ५ जुन १९१० मा ओ. हेनरी अर्थात् विलियम सिड्नी पोर्टरको मृत्यु भएको थियो ।
