कवि तथा गीतकार कला सेरेङको कविता तथा गीत सङ्ग्रह ‘कलाका अन्तर्मन’ सार्वजनिक भएको छ । नेपाल प्रज्ञा प्रतिष्ठानका कुलपति भुपाल राईले हालै एक समारोहबीच यो कृति सार्वजनिक गरेका हुन् ।
लामो समयदेखि हङकङमा बस्दै आएका सेरेङको यो पहिलो कृति हो । ‘कलाका अन्तर्मन’मा १ सय १५ शीर्षकका गीत तथा कविता छन् । परदेशमा रहँदा गरिएको घर/देशको सम्झना कृतिको प्रमुख विषयवस्तु हो ।
कवि सेरेङ डायस्पोरामा रहँदा मातृभूमिको मायाले उत्पन्न गराएको भावनालाई नै यसमा उतारिएको बताउँछिन् । ‘मैले नेपाली साहित्यको इतिहास पढेर, सिद्धान्त घोकेर कुनै रचना रचेको छैन । हामी डायस्पोरामा रहेर मातृभूमि र नेपाली भाषाको श्रीवृद्धि गर्ने चाहनाले भावनाको सँगालो प्रकाशनमा ल्याएको हुँ,’उनले भनिन् ।
कार्यक्रममा नृसिंह कुमार खत्री, वरिष्ठ चलचित्र निर्देशक विनोद श्रेङ, नेपाल सरकारका उपसचिव कुलराज सुनुवार, नेपाल प्रज्ञा प्रतिष्ठानका प्राज्ञ चेतनाथ धमल, गीतकार सरिता राईलगायतको उपस्थिति थियो ।
