गीतकार सरला श्रेष्ठको ५६ गीत समावेश गरिएको ‘शारदा’ मासिक पत्रिकाको कात्तिक अंक अभिनेता मदनकृष्ण श्रेष्ठ, गीतकार एसपी कोइराला, कवि तथा गीतकार विश्वबल्लभ, साहित्यकार विमल भौकाजी, गीतकार संघका अध्यक्ष बसन्त वित्यासी थापा लगायतले ‘शारदा’ मासिक पत्रिकाको कात्तिक अंक विमोचन गरे । समारोहमा मासिकका प्रधान सम्पादक भौकाजीले नेपालमा एकल सर्जकको हस्तलिपिमा कुनै पनि पत्रिकामा विशेषांक प्रकाशन गरेको यो पहिलो पटक भएको बताए ।
गीतकार श्रेष्ठले ‘शारदा’ जस्तो ऐतिहासिक साहित्यिक पत्रिकामा आफ्नो हस्तलिपिमा एकल गीति विशेषांक प्रकाशित भएकोमा गौरवको क्षण महसुस गरिरहेको बताइन् । समारोहमा उनले प्रकाशित गीत वाचन गर्दै विदेशमा रहँदा सधैं देशलाई शिरमा राखेर हिंडिरहेको बताइन् । गीतकार श्रेष्ठले आफ्नो शरीर मात्र विदेशमा रहेको, तर मन र मुटु सधैं स्वदेशमै रहेको बताइन् ।
समारोहमा एउटा युगल गीत ‘ए मेरो मनको राजा’को म्युजिक भिडियो समेत प्रिमियर गरियो । प्रमोद खरेल र अञ्जु पन्तको युगल स्वरको यो गीतमा कीर्ति न्यौपानेको संगीत छ । यो गीतको म्युजिक भिडियोको निर्देशन कृष्णदेव रुपाखेतीले गरेका हुन् । भिडियोमा अभिनेता पुष्प खड्का तथा अभिनेत्री गरिमा शर्माको जोडीलाई चित्रण गरिएको छ ।
गीतकार संघ नेपालका अध्यक्ष थापाले गीत–संगीतको क्षेत्रलाई लगानीको पनि सुनिश्चितता गर्ने गरी काम अगाडि बढाएको बताए । ‘लगानी पनि सुनिश्चित गर्नुपर्छ भनेर हामी उद्यमी संस्थागत हिसाबले उद्योगको रुपमा स्थापित हुनुपर्छ भनेर गीत-संगीतको क्षेत्रलाई अगाडि बढाइरहेका छौं,’ उनले भने ।
