खेमलाल–हरिकला लामिछाने समाज कल्याण प्रतिष्ठानले शिक्षाविद् एवं काठमाडौं विश्वविद्यालयका संस्थापक सुरेशराज शर्मालाई पद्मश्री गौरव र कार्टुनिस्ट दुर्गा बराल ‘वात्स्यायन’ लाई पद्मश्री साधना प्रदान गरिएको छ।
यस वर्षको पद्मश्री साहित्य पुरस्कार ‘मनु’ उपन्यासका लागि देवीप्रसाद सुवेदीले प्राप्त गरेका छन् । खेमलाल–हरिकला लामिछाने समाज कल्याण प्रतिष्ठानले हरेक वर्ष प्रदान गर्दै आएको उक्त साहित्यिक पुरस्कार सुवेदीले पाएका हुन् ।
गत वर्ष प्रकाशितमध्ये प्रतिष्ठानलाई प्राप्त १ सय ८० पुस्तकबाट १५ कृतिको सर्ट लिस्ट तयार पारिएको थियो। त्यसपछि अन्तिम पाँच पुस्तकको सूची सार्वजनिक गरिएको थियो। यसमध्येबाट ‘मनु’ उपन्यासलाई उत्कृष्ट साहित्यिक कृतिका रूपमा घोषणा गरिएको हो।
प्रतिष्ठानले २०६३ सालदेखि निर्णायक मण्डलको छनोटका आधारमा साहित्यिक पुरस्कार प्रदान गर्दै आएको छ। प्रतिष्ठानले प्रत्येक वर्ष लामो समयदेखि समाजमा योगदान पुर्याएका व्यक्तित्वलाई पद्मश्री गौरव र कला क्षेत्रमा सक्रिय योगदान पुर्याएकालाई पद्मश्री साधना पुरस्कार प्रदान गर्दै आएको छ। साहित्यिक पुरस्कार, पद्मश्री गौरव र पद्मश्री साधना गरी तीनवटै पुरस्कारको राशि तीन–तीन लाख रुपैयाँ रहेको छ। प्रतिष्ठानका अध्यक्ष जीवा लामिछानेले राष्ट्रको विकासमा साहित्यिक उचाइको समेत उत्तिकै महत्त्व रहने बताए। पछिल्लो समय तीव्र प्रविधिको प्रयोगले किताब पढ्ने संस्कृति ओझेल पर्दै गएकामा उनले चिन्ता व्यक्त गरे। यद्यपि साहित्यिक सम्मान र पुरस्कार प्रदानजस्ता कार्यक्रमले साहित्य र साहित्यिक संस्कृति जोगाउन कतै न कतै टेवा पुगेको दाबी गरे।
