स्त्रीरोग विशेषज्ञ प्रा. डा. सुमनराज ताम्राकारद्वारा लिखित महिला स्वास्थ्यसम्बन्धी जानकारीमूलक पुस्तक ‘स्वस्थ महिला’ सार्वजनिक भएको छ । प्रज्ञा प्रतिष्ठानमा आयोजित कार्यक्रममा डा. सरोजा पाण्डे, प्रा. डा. सानुमैयाँ दली, प्रा.डा. प्रमिला प्रधान, प्रा.डा. आश्मा राना, प्रा.डा. लता बज्राचार्य, प्राज्ञ तथा लेखक अमर न्यौपानेलगायतले सामूहिकरुपमा पुस्तक विमोचन गरेका हुन् ।
पुस्तकमा बाल्यकालबाट किशोरावस्थामा प्रवेश गर्दाका शारीरिक परिवर्तन, किशोरावस्थाका जटिलता र जिज्ञासा, महिनावारी, पाठेघर र डिम्बाशयबारे जानकारी, यौनजन्य संक्रमण, बाँझोपन, रजोनिवृत्तिलगायत विषयलाई समेटिएको छ । साधारण जानकारीको अभावमा महिलाहरुले कष्ट बेहोर्नुपरेको अनुभवका आधारमा उनीहरुको समस्यामा केन्द्रित रही पुस्तक तयार गरिएको लेखक ताम्राकारको भनाइ थियो ।
कृतिमाथि चर्चा गर्दै डा. सपना अमात्यले किशोरावस्थामा देखिने शारीरिक परिवर्तनदेखि रजानेवृत्तिसम्मका अवस्था सरल किसिमले लेखिएको मेडिकल बुक जस्तै रहेको बताइन् । उनका अनुसार सरल व्यक्तित्वमात्रै नभई काम, व्यक्ति र लेखाई पनि सुमन छ ।
प्रा.डा. आभा श्रेष्ठ, प्रा.डा. पदमराज पन्त, नेपाल प्रज्ञा प्रतिष्ठानका प्राज्ञ सदस्य तथा लेखक अमर न्यौपानेलगायत वक्ताले उक्त पुस्तक सहरदेखि दुरदराजका हरेक महिलाका लागि आवश्यकीय रहेको बताए । उनीहरुले स्वास्थ्य तथा जनसंख्या मन्त्रालय तथा स्थानीय तहहरुले स्वास्थ्य चौकीमा आउने महिलाको उपचारपछि ‘स्वस्थ महिला’ पुस्तक वितरण गर्नुपर्ने सुझाव दिए ।
