भारतका सुप्रसिद्ध रङ्गकर्मी तथा अभिनेत्री शबाना आजमी नेपाल आउने हुनुभएको छ । उहाँ दोस्रो नेपाल अन्तर्राष्ट्रिय नाट्य महोत्सव २०७९ मा विशेष अतिथिको रूपमा सहभागी हुन काठमाडौँ आउन लाग्नुभएको हो ।
आउँदो मङ्सिर ९ गते सुरु हुने महोत्सवको उद्घाटनमा विशेष अतिथिको रूपमा आयोजक मण्डला थिएटरले रङ्गमञ्च र चलचित्रमा सुप्रसिद्ध अभिनेत्री आजमीलाई आमन्त्रण गरेको हो । सामाजिक रूपान्तरणको लागि रङ्गमञ्च: विविधताको उत्सव भन्ने नाराका साथ हुन लागेको यस महोत्सवमा उहाँले नेपाली रङ्गकर्मी तथा कलाकारहरूलाई ‘मास्टर क्लास’ पनि दिनुहुने महोत्सवकी निर्देशक सिर्जना सुब्बाले जनाउनुभएको छ ।
मास्टर क्लास महोत्सवको दोस्रो दिन मङ्सिर १० गते साँझ ७ः३० बजे मण्डला थिएटरको मुख्य हलमा हुनेछ । साथै अभिनेत्री शबाना आजमीले महोत्सवले आह्वान गरेको ‘इनोभेटभि आइडिया अवार्ड’का लागि आवेदन परेकामध्ये एक अवधारणालाई आयोजकको तर्फबाट पुरस्कृत पनि गर्नुहुने महोत्सवकी संयोजक विजया कार्कीले बताउनुभयो ।
भारतमा सबैभन्दा प्रशंसित अभिनेत्रीहरू मध्ये एक शबाना आजमीले उत्कृष्ट अभिनेत्रीका लागि पाँच राष्ट्रिय फिल्म फेयर अवार्ड तथा विभिन्न अन्तर्राष्ट्रिय सम्मान पाउनुभएको छ । विशिष्ट र अपरम्पारगत महिलाको चित्रणका लागि परिचित आजमीलाई भारत सरकारले सन् १९९८ मा ‘पद्य श्री’ र सन् २०१२ मा ‘पद्य भूषण’बाट सम्मान गरेको थियो ।
मण्डला थिएटरमा मङ्सिर १७ सम्म आयोजना हुने महोत्सवमा देश–विदेशका २२ नाटकको सहभागिता हुनेछन् । महोत्सवमा नेपालसहित भारत, भुटान, श्रीलङ्का, रुस, इटाली, स्पेन, बेलायत, बेला रुस, इजिप्ट, संयुक्त राज्य अमेरिका, उरुग्वे र अर्जेन्टिनाका नाटकहरू समावेश छन् ।
