साहित्यिक पत्रकार संघले थाहा पुस्तकालय, मीन भवन, काठमाडौँमा संघका पूर्व अध्यक्ष सर्जक नरेन्द्रबहादुर श्रेष्ठको “अमृत महोत्सव”को अवसरमा बधाई ज्ञापन र “शारदा मासिक”को साहित्यिक पत्रकार संघ स्वर्ण महोत्सव विशेष अङ्क”को लोकार्पण समारोहको आयोजना गर्यो ।
साहित्यिक पत्रकार संघका अध्यक्ष साहित्यकार राधेश्याम लेकालीको अध्यक्षतामा सम्पन्न सो समारोहका प्रमुख अतिथि वरिष्ठ कवि एवं सस्कृतिविद तुलसी दिवसले शारदा मासिक” साहित्यिक पत्रकार संघ स्वर्ण महोत्सव विशेष अङ्क”को लोकार्पण गर्नु भयो । प्रमुख अतिथिले दिवसले सापसका पूर्व अध्यक्ष वरिष्ठ सर्जक नरेन्द्रबहादुर श्रेष्ठलाई “अमृत महोत्सव”को अवसरमा “बधाई पत्र” प्रदान गर्नु भयो । यसैगरी स्रष्टा समाज नेपालका नवनिर्वाचित अध्यक्ष साहित्यकार श्री ओम श्रेष्ठ रोदनलाई साहित्यिक पत्रकार संघको तर्फबाट बधाई ज्ञापन गरिएको थियो ।
कार्यक्रममा प्रमुख अतिथि तुलसी दिवस, विशेष अतिथिहरू वरिष्ठ समालोचक प्रा.डा. गोविन्दराज भट्टराई, वरिष्ठ नाट्यकर्मी एवं साहित्यकार अशेष मल्ल, नेपाल साहित्यिक पत्रकार संघका अध्यक्ष मोहन दुवाल, प्रगतिशील लेखक संघका पूर्व अध्यक्ष साहित्यकार मातृका पोखरेल, “शारदा मासिक” सम्पादक साहित्यकार विमल भौकाजी, सापस पूर्व अध्यक्ष सर्जक नरेन्द्रबहादुर श्रेष्ठलगायतले आआफ्नो मन्तव्य राख्नु भएको थियो ।
