नेपाली आख्यान क्षेत्रका सशक्त व्यक्तित्व परशु प्रधानको एक समारोहका बिच सार्वजनिक अभिनन्दन गरिएको छ ।
शनिवार काठमाडौँमा आख्यानकार प्रधानलाई दोसल्ला र दुबोको मालासहित अभिनन्दन पत्र प्रदान गरियो । उक्त अवसरमा उनकी जीवन संगीनी साहित्यकार कल्पना प्रधानलाई पनि माला र दोसल्ला सहित सम्मान गरियो ।
नेपाल स्रष्टा समाजद्वारा आयोजित कार्यक्रममा समाजसहित २९ साहित्यिक संस्थाले आख्यानकार प्रधानलाई अभिनन्दन गरेका हुन् । कार्यक्रममा अभिनन्दित स्रष्टा परशु प्रधानले आफू सङ्घर्ष गर्दै यहाँसम्म आइपुगेको सुनाए । आफूलाई समाजसहित साहित्यिक सङ्घ–संस्थाहरूले सार्वजनिक अभिनन्दन गरेकामा औधी खुसी लागेको उनले बताए ।
कार्यक्रममा साहित्यिक पत्रकार नगेन्द्रराज शर्माले प्रधानसँगको मित्रताको चर्चा गरे । उनले उमेरका हिसाबले आफू जेठो भए पनि लेखनका हिसाबले परशु प्रधान आफूभन्दा निकै जेठो र अग्लो भएको बताए ।
नेपाल स्रष्टा समाजको स्थापनाकारहरूमध्येका एक साहित्यकार प्रधान एउटा सिङ्गो संस्थाका रूपमा खडा भएको समाजका संरक्षक पवन आलोकले बताए ।
साहित्यकार श्री ओम श्रेष्ठ रोदनले ३०० भन्दा बढीको सङ्ख्यामा कथा लेखिसकेका आख्यानकार प्रधानमाथि आफूले लेखेको निबन्धको अंश वाचन गरे । जसमा सारांशमा प्रधानको छोटो व्यक्तित्व झल्किने भावहरू थिए ।
स्रष्टा समाजसहित अभिव्यक्ति द्वैमासिक, रचना द्वैमासिक, जनमत मासिक, उपन्यास समाज नेपाल, शंकर लामिछाने प्रतिष्ठान, दायित्व वाङ्मय प्रतिष्ठान, गुञ्जन साहित्य समूह, नारी स्रष्टा समाज, वासु शशी स्मृति परिषद्, जरा फाउन्डेसन, भूगोल साहित्य समाज, कल्पतरु मासिकलगायत साहित्यिक संस्थाले आख्यानकार प्रधानको सार्वजनिक अभिनन्दन गरेका हुन् ।
