यस वर्षको बीपी साहित्य सम्मान पुरस्कार वरिष्ठ साहित्यकार कृष्णप्रसाद गौतमलाई दिइने भएको छ । बीपी कोइराला स्मृति ट्रस्टले नेपाली साहित्यको श्रीवृद्धिमा महत्त्वपूर्ण भूमिका खेलेको भन्दै गौतमलाई पुरस्कार दिने निर्णय गरेको जनाएको हो ।
ट्रस्टका कोषाध्यक्ष पुरुषोत्तम बस्नेतको संयोजकत्वमा ध्रुवचन्द्र गौतम र सुशीलमान शेरचनसमेतको सिफारिस समितिको सर्वसम्मतिबाट गौतमलाई पुरस्कार दिने निर्णय गरिएको ट्रस्टले जनाएको छ । पुरस्कारको राशि १ लाख १ हजार रुपैयाँ रहेको छ ।
त्यस्तै ट्रस्टले यस वर्षको बीपी स्मान पुरस्कार वीरगन्जकी पूर्वउपमेयरसमेत रहेकी ९१ वर्षीया शान्ति कार्कीलाई दिने निर्णय गरेको छ । प्रजातन्त्र स्थापनाको संघर्षमा महत्त्वपूर्ण योगदान पुर्याएको भन्दै उनलाई सेनानी सम्मान दिने निर्णय भएको ट्रस्टले जनाएको छ । पुरस्कारको राशि ५१ हजार रहेको छ । यी पुरस्कारहरु आगामी भदौ २४ गते बी.पी. जयन्तीको अवसरमा काठमाडौंमा आयोजना हुने विशेष समारोहमा प्रदान गरिने छ ।
यसअघि २०७१ मा बीपी साहित्य सम्मान वरिष्ठ साहित्यकार स्व. रत्नशम्शेर थापा र बीपी सेनानी सम्मान पुरस्कार नूतन थपलिया, २०७२ मा साहित्यकार गोपाल पराजुली र सेनानी सम्मान स्व. तारानाथ कोइराला, २०७३ साहित्यकार भुवन ढुङ्गाना र सेनानी सम्मान श्यामलाल श्रेष्ठ, २०७४ मा साहित्यतर्फ प्रा. अभि सुवेदी र सेनानी सम्मान दाङका तीर्थराज चैतु २०७५ मा साहित्यतर्फ रोचक घिमिरे र प्रजातन्त्र सेनानी सम्मान स्व. चक्र प्रसाद बास्तोला, २०७६ मा बीपी साहित्य सम्मान तिल विक्रम नेवाङलाई (बैरागी काहिला) र प्रजातन्त्र सेनानी सम्मान मधुकान्त सिंहलाई प्रदान गरी सकिएको छ ।
२०७७ सालको वरिष्ठ साहित्यकार तथा इतिहासकार ज्ञानमणि नेपाललाई प्रदान गरिएको छ । यसैगरी बीपी सेनानी सम्मान पुरस्कार २०७७ प्रजातन्त्र स्थापनाको संर्घषमा महत्त्वपूर्ण योगदान पुऱ्याउने होमनाथ दाहाललाई प्रदान गरिएको थियो । २०७८ को साहित्य सम्मान कवि मदन रेग्मी र सेनानी सम्मान भक्तपुर जिल्लाका प्रजातन्त्र सेनानी तिलकप्रकाश कायस्थलाई प्रदान गरिसकेको छ ।
