२०९ औं भानुजयन्तीका अवसरमा नेपाल प्रज्ञा प्रतिष्ठानद्वारा गरिएको ‘भानुभक्तको जीवनी’ विषयक प्रवचन तथा ‘नयाँ पुस्ताबाट भानुभक्तीय रचना वाचन’ कार्यक्रममा प्रतिष्ठानका कुलपति गंगाप्रसाद उप्रेती, उपकुलपति डा.जगमान गुरुङ, सदस्य सचिव प्रा.जगतप्रसाद उपाध्याय, नेपाली शिक्षा परिषद्का अध्यक्ष रमा शर्मा लगायतले भानुभक्त र उनको योगदानलाई नयाँ पुस्ता समक्ष पुर्याउनु पर्ने धारणा व्यक्त गरे ।
प्रतिष्ठानले विगतमा एउटा विषयमा विमर्श भानुजयन्ती मनाइँदै आएपनि यसपटक बालबालिकाले भानुभक्तको रचनावाचन गर्ने गरी कार्यक्रम तय गरेको हो । नयाँ पुस्तासित भानुभक्तको जीवनी र रचनाका बारेमा परिचित गराउने उद्देश्यले नै विद्यालय तहका विद्यार्थीलाई भानुभक्तीय रचनावाचन कार्यक्रम गरेको कुलपति उप्रेतीले बताए । कार्यक्रममा राजधानीका विभिन्न विद्यालयका आधा दर्जनभन्दा बढी विद्यार्थीहरुले भानुभक्तलाई आ–आफ्नो रचना मार्फत स्मरण गरे । ‘भानु बहुआयामिक व्यक्तित्व हुनुभएकाले भौगोलिक सीमाभन्दा बाहिर गएर भानु जयन्ती मनाउनुपर्छ’, उनले भने,‘छन्दमा कविता सिर्जना गर्ने सीप विद्यार्थीमा होस् भन्ने नै प्रज्ञा–प्रतिष्ठानको उद्देश्य हो र यसले साहित्यको प्रवद्र्धनमा समेत योगदान गर्ने हाम्रो विश्वास रहेको छ ।’
भानुभक्तले रामायण प्रश्नोत्तर, भक्तमाला जस्ता कृतिको सिर्जना गरेका छन् । सदस्य–सचिव प्रा.जगत्प्रसाद उपाध्यायले भानुभक्तका कृतिले १९ तत्कालीन समाजको वास्तविक प्रतिनिधित्व गरेको बताए । उनले भने, ‘तत्कालीन समाजमा रहेको प्रशासनिक ढिलासुस्तीलाई भानुभक्तले व्यङ्ग्यात्मक हिसाबले प्रस्तुत गर्नुभएको छ ।’
कार्यक्रममा अनुसन्धानकर्ता प्रा.डा. शर्वराज आचार्यद्वारा लिखित तथा प्रज्ञा–प्रतिष्ठानबाट प्रकाशित कृति भानुभक्तको जीवनीका मतान्तरको तुलनात्मक अध्ययन नामक कृतिको सार्वजनिकीकरण समेत गरिएको छ ।
नेपालमा भानुभक्तको जन्मजयन्ती मनाउने कार्यको सुरुवात २०१० सालबाट सुरु भएको हो । २०१० सालमा गोपाल पाण्डेको सक्रियतामा भानु जयन्ती मनाउन थालिएको हो । भानुभक्तको जन्य जयन्तीका बारेमा इतिहास शिरोमणि बाबुराम आचार्यले समर्थन समेत जनाएपछि असार २९ गते उनको जन्म जयन्ती मनाउन थालिएको हो ।
