अमेरिका निवासी कवि वसन्त श्रेष्ठले आफ्ना स्वर्गीय पिता नारायणमान श्रेष्ठको सम्झनामा तयार पारिएको “नारायणमान श्रेष्ठ इतिवृत्त” पुस्तक एक कार्यक्रमबीच सार्बजनिक गरिएको छ । काठमाडौमा एपेक नेपालद्वारा आयोजित एक समारोहमा प्रमुख अतिथि स्वास्थ्य मन्त्री भवानीप्रसाद खापुङले “नारायणमान श्रेष्ठ इतिवृत्त”पुस्तकको लोकार्पण गर्नुभएको हो । उहाँले तेह्रथुमबाट निस्किएको पहिलो पत्रीका मगजलाई स्मरण गर्दै साहित्यमा जति रुचि भएपनी धेरै पाठकलाई बुझ्न र पढ्न कठिन हुने हुन्छ भने लेख्न कति गाह्रो भयो होला भन्दै लेखकको लेखाईप्रती सम्मान व्यक्त गर्नुभयो । खापुङ्ग्ले २०५९ सालमा तेह्रथुममा लागेको आगोपछि तेह्रथुममा आएको सहयोगबाट तेह्रथुमको पहुँच सबै क्षेत्रमा उत्कृष्ट रहेको बताउनुभयो । कार्यक्रममा एपेक नेपालका कार्यक्रम निर्देशक राजेन्द्र शलभले स्वागत मन्तव्य राख्नुभएको थियो।
वरिष्ठ साहित्यकार प्रा.डा. अभि सुवेदीले स्वर्गीय नारायणमान श्रेष्ठले आफूलाई दिनुभएको ज्ञानको स्मरण गर्दै नारायणमान श्रेष्ठको कृतित्व , व्यक्तित्व र योगदानको बारेमा चर्चा गर्नुभयो । उहाँले आफ्नो जम्मथलो तेह्रथुमको
आर्थिक , सामाजिक , राजनीतिक र शिक्षाको विकासको जग बसाउन मात्रै नभई तेह्रथुममा सद्भावको संस्कृति स्थापना गर्न समेत नारायणमान श्रेष्ठ स्वयं तथा श्रेष्ठका पिता लोकमान श्रेष्ठको विशेष भुमिका रहेको खुलेर प्रसंशा गर्नुभयो । कृतिका लेखक बसन्त श्रेष्ठले आफ्नो बुबामाथी लेखिएको इतिवृत्त पुस्तकमा तेह्रथुम जिल्लामा आफ्ना पिताले सरकारी र गैरसरकारी स्तरमा रहि आर्थिक , सामाजिक र राजनीति क्षेत्रमा गर्नुभएको सेवाका विषयवस्तुहरु उल्लेख गरि पुस्तक लेखिएको बताउनुभयो ।
नारायणमान श्रेष्ठका पारिवारिक सदस्यबाट नारायणमान श्रेष्ठको तस्वीरमा दिप प्रज्वलन र माल्यार्पण गरिएकाले सुन्दर र आकर्षक देखिएको सो समारोहमा स्रष्टा र सर्जकहरु माया ठकुरी, मञ्जुल, पद्मावती श्रेष्ठ, भागिरथी श्रेष्ठ,चन्द्रबहादुर कार्की, प्रमोद प्रधान, किशोर पहाडी, विजय सुब्बा,मुकेश मल्ल,जयदेव भट्टराई, कोषराज न्यौपाने, शङ्कर भारती, प्रद्युम्न जोशी, गोकुल अधिकारी, केदार न्यौपाने, श्रीओम श्रेष्ठ रोदन, विक्रमभक्त जोशी, ललिता मल्ल, प्रज्ज्वल अधिकारी , एलिसा ढुंगाना लगायत अन्य विशिष्ट अतिथिहरूको बाक्लो उपस्थिति रहेको थियो ।
उक्त कार्यक्रमलाई कवि मणि लोहनीले सञ्चालन गर्नुभएको थियो भने कार्यक्रमको सभापतित्व एपेक नेपालका अध्यक्षसमेत रहनु भएका कवि विश्वविमोहन श्रेष्ठले गर्नुभएको थियो । उहाँले कार्यक्रममा २५० पृष्ठमा रहेको “नारायणमान श्रेष्ठ इतिवृत्त” पुस्तकका बारेमा फेरि पनि चर्चापरिचर्चा र अन्तरक्रिया गर्ने बताउनु भएको छ ।
