साहित्यकार उषा शेरचनको नयाँ मुक्तक संग्रह ‘त्रासदीका हिमनदी’ को शनिबार पोखरामा एक विशेष समारोहका बीच विमोचन गरिएको छ।
पोखरेली युवा सांस्कृतिक परिवारको आयोजनामा सम्पन्न कार्यक्रममा साहित्यकार सरुभक्त, कवि तीर्थ श्रेष्ठलगायत विशिष्ट व्यक्तित्वहरूको उपस्थिति थियो। पुस्तकको लोकार्पण सामूहिक रूपमा अतिथिहरूको हातबाट गरिएको हो।
चार सय उनसठ्ठी (४५९) मुक्तक समेटिएको उक्त संग्रह शेरचनले पोखरेली युवा सांस्कृतिक परिवारलाई समर्पण गरेकी छन्। यसअघि सन् २०५६ सालमा प्रकाशित ‘अक्षरहरूका शिविरबाट’ मुक्तक संग्रहपछि यो उनको दोस्रो मुक्तक संग्रह हो।
कार्यक्रममा मुक्तकमा विद्यावारिधि गरेका समालोचक डा. मुरारी पराजुलीले उषा शेरचनलाई नेपालमा मुक्तक संग्रह प्रकाशित गर्ने पहिलो महिला मुक्तककारको रूपमा स्मरण गरे। “उषाका मुक्तकहरू सामाजिक पीडा, राजनीतिक व्यंग्य, प्रणय भावनाको शिष्ट चित्रण, युद्ध र युगीन जटिलता, महिलामाथिको शोषण र त्यसप्रतिको विद्रोहजस्ता विविध आयाम समेट्ने खालका छन्,” डा. पराजुलीले भने।
समारोहमा उषा शेरचनले यो कृति सार्वजनिक गर्दै मुक्तक विधामा अब लेखन नगर्ने घोषणा पनि गरिन्। तर, अन्य विधामा लेखन भने निरन्तर जारी रहने बताइन्।
कार्यक्रममा उपन्यासकार सरस्वती प्रतीक्षा, लेखक कुमारी लामा, लक्ष्मण थापा, एमडी काफ्ले, केशु शर्मा, हरिदेवी कोइरालालगायतले उषाको साहित्यिक यात्राको चर्चा गरे।
विमोचन समारोहमा रुपिन्द्र प्रभावी कटु, ईश्वरमणि अधिकारी, अमृत क्षेत्री, सरस्वती श्रेष्ठ र केशु शर्माले संग्रहका मुक्तकहरू वाचन गरेका थिए।
उषा शेरचनका ‘नजन्मेका आस्थाहरू’ (फुटकर कविता), ‘सर्वकालीन पीडा र जागृतिको शंखघोष’ (कविता), ‘तेस्रो रङ’ (कथा संग्रह), ‘बेग्लै म’ र ‘आँधी’ (उपन्यास) जस्ता कृतिहरू प्रकाशित भइसकेका छन्।
