शिक्षाविद् रमेशप्रसाद गौतमको कृति ‘मेरो अन्तरङ्ग’ सार्वजनिक भएको छ । सोमबार आयोजित पुस्तक लोकार्पण कार्यक्रममा नेपाली कांग्रेसका केन्द्रीय सदस्य अर्जुननरसिंह केसीले उक्त पुस्तक विमोचन गरेका हुन् । गौतमको जन्मथलो किम्सी पुल्डोलस्थित सामुदायिक भवनमा आयोजित कार्यक्रममा उक्त पुस्तक विमोचन गरिएको हो । किम्सी पुल्डोल साविकको स्यूचाटार गाविस र हाल नागार्जुन नगरपालिका वडा. ७ मा पर्छ ।
गौतमका स्थानीय बन्धुहरुको सहभागीतामा भएको उक्त विमोचन कार्यक्रममा विदेश मामिला विज्ञ प्रा.जयराज आचार्य, त्रिविविका पूर्व उपकुलपति डा तीर्थ खनिया, सुदुर पश्चिमाञ्चल विश्वविद्यालयका पूर्व उपकुलपति अमरराज जोशी, नेपाल सरकारका पूर्व सचिव एवं गभर्नर दिपेन्द्रपुरुष ढकाल, नेपाल संस्कृति विश्वविद्यालयका प्राध्यापक डा.जनक भट्टको उपस्थिति रहेको थियो ।
प्रमुख अतिथि अर्जुन नरसिंह केसी, विशिष्ट अतिथिहरु जयराज आचार्य, तीर्थ खनिया, अमरराज जोशी, डा जनक भट्ट लगायतका वक्ताहरुले शिक्षा क्षेत्रमा गौतमले पुराएको योगदान र उनको पुस्तक लेखनबारे चर्चा गरेका थिए । अवकास जीवन विताइरहेका गौतमले पुस्तक लेखनमार्फत आफूलाई सक्रिय बनाएकोमा पनि वक्ताहरुले उनको प्रसंसा गरेका थिए । कार्यक्रममा पत्रकार राजाराम गौतमले पुस्तकबारे टिप्पणी गरेका थिए भने कार्यक्रम सञ्चालन गंगाधर गौतमले गरेका थिए । शिक्षाविद गौतमको यो चौधौ कृति हो ।
