प्रगतिवादी साहित्यकार राम विनयको नवौं पुस्तक पुनर्जन्म प्रकाशित भएको छ । कोभिड महामारीको समयमा आफ्ना पिता तथा दुई भाइहरुको मृत्यु भएको विषय र लेखक स्वयंले कोभिडको कारण गम्भीर भएर झन्डै तीन हप्ता अस्पताल बस्नु परेको संस्मरण उनले पुस्तकमा उतारेका छन् ।
उनले परिवारमा भएको बज्रपात तथा आफूले सहनु परेको पीडाबारे पुस्तकमा लेखेको जनाए ।
उनले भने, ‘अस्पतालमा रहँदा बाहिरबाट एकजना भाइको निधन थाहा पाएँ, बुबा र अर्को भाइको निधन अस्पतालबाट डिस्चार्ज भएपछि मात्र थाहा पाएँ । घरमा सबैलाई कोरोना संक्रमण भएको पनि घर आएपछि थाहा पाएँ । मैले आइसियुमा हरेक पल जीवन र मृत्युको रेखामा संघर्ष गरें, यही विषयवस्तु पुस्तकमा समेटेको छु ।’
कविता, नियात्रा तथा निबन्ध विधामा कलम चलाउने राम विनय साहित्य सन्ध्या, जनसाहित्य संघ लगायत संस्थामा आबद्ध छन् । उनले प्रतिभा पुरस्कार, महाकवि देवकोटा पुरस्कार, रमेश विकल सम्मान, युद्धप्रसाद मिश्र सम्मान, प्रगतिशील लेखक संघ सम्मान आदि दर्जनौं पुरस्कार तथा सम्मान प्राप्त गरेका छन् । पुनर्जन्म (संस्मरण) शिखा बुक्सले प्रकाशन गरेको हो ।
