अनिल श्रेष्ठको नयाँ निबन्ध कृति `यो मन कहाँ दुख्छ ?´माथि विमर्श कार्यक्रम सम्पन्न भएको छ । इच्छुक साँस्कृतिक प्रतिष्ठानको सिर्जना र संवाद कार्यक्रमको पाँचौं शृङ्खलामा प्रतिष्ठानले अनिल श्रेष्ठको उक्त कृतिमाथि विमर्श कार्यक्रमको आयोजना गरेको हो ।
प्रा डा. जगदीशचन्द्र भण्डारी, डा. अमर गिरी, प्राडा नन्दीश अधिकारी र तेजविलास अधिकारीले किताब माथि आ-आफ्ना टिप्पणीहरू प्रस्तुत गरेका थिए । सङ्ग्रहभित्र रहेका निबन्धहरू सरल, पठनीय र सुरूचिपूर्ण रहेको, पाठकले एक बसाइमा पढिसक्ने, पढि सक्दासम्म एकै ठाउँमा बाँधेर राख्नसक्ने शक्ति निबन्धमा रहेको समान धारणा सबै टिप्पणीकर्ताहरूले राखेका थिए ।
यो मन कहाँ दुख्छ ?´ रयोग एक उन्मुक्त जीवनशैली´ जस्ता केही निबन्धहरूले वैचारिक बहसको माग गरेको र योग र अध्यात्मलाई बुझ्न र अध्ययन गर्न मार्क्सवादी लेखकले एउटा स्पष्ट धारणा बनाउनु पर्ने कुरालाई डा. अमर गिरीले आफ्नो टिप्पणीको क्रममा राखेका थिए ।
प्रा डा. जगदीशचन्द्र भण्डारीले भाषाशैलीका हिसाबले निबन्धहरू ललित खालकाे रहेको र नवीन शैलीको प्रयोग रहेको बताए । प्राडा. नन्दीश अधिकारीले निबन्धमा भूगोलको बर्णनले पाठकलाई लेखकले घुमेका ठाउँहरूको प्रसस्त जानकारी पाइने र लेखकले पाठकलाई पनि आफूसँगसँगै ती ठाउँहरूमा पुर्याउने बताए ।
तेजविलास अधिकारीले निबन्धहरूले पाठकलाई एक किसिमले सम्वेदित बनाउने बताए । कार्यक्रममा कवि तथा निबन्धकार मित्रलाल पंज्ञानी, भुँणीपुृराण प्रकाशनका केशव अधिकारी, लेखक अनिल श्रेष्ठले किताबबारे आफ्ना धारणाहरू राखेका थिए ।
सिर्जना र संवाद कार्यक्रमका अध्यक्ष गौरी देवकोटाको अध्यक्षता रहेको कार्यक्रममा कवि मोदनाथ मरहट्टाले उपस्थित स्रष्टा र साहित्यकारहरूलाई स्वागत मन्तव्य राखेका थिए ।
कार्यक्रमलाई सुनिता बुढाथोकीले सञ्चालन गरेकी थिइन् ।
