गत शुक्रवारको साँझ राष्ट्रिय नाचघर मिनी हलमा बेग्लै साङ्गीतिक रौनक थियो। । बाहिर भारी वर्षाले कार्यक्रममा कुनै असर परेको थिएन । सबै कुर्सीहरू भरिएका थिए र भुईँमा पनि शास्त्रीय सङ्गीत रुचाउनेहरू खचाखच थिए ।
ध्रुपद सेन्टर नेपालले इकोज् अफ राग नामक शास्त्रीय सङ्गीत कार्यक्रम आयोजना गरेका हुन् । नेपालमा शास्त्रीय सङ्गीतको कार्यक्रमहरुमा युवा पुस्तालाई त्यति समावेश गर्ने सकेको देखिदैंन । तर ध्रुपद सेन्टरले आयोजना गरेको यस कार्यक्रममा सङ्गीतमा लागि रहेका युवापुस्ताहरूको पनि उत्तिकै सहभागिता थियो । जसको श्रेय ध्रुपद सेन्टरका अध्यक्ष गायक श्री केसी र उनका शिष्यहरू लाई जान्छ ।
कार्यक्रममा सरोद वादक सुरेशराज बज्राचार्य, इसराज वादक सन्तोष भक्त श्रेष्ठ, तबला वादक मिलेश तण्डुकार तथा गायक नवराज सापकोटाको प्रस्तुति थियो । युनिशा शेर्पा देशार,गायत्री राना,रोशा फुयालले कलाकारहरुलाई तानपुरा बजाएर साथ दिएका थिए । साङ्गीतिक प्रस्तुति भइ रहँदा हल भरिका सबै दर्शक श्रोताहरू शास्त्रीय सङ्गीतमा आनन्दित लिई रहेको दृश्य पनि लोभ लाग्दो थियो ।
कार्यक्रममा कलाकारहरूको जीवन सङ्गिनीहरूलाई पनि दोसल्ला ओढाएर सम्मान गरिएको थियो । सम्भवतः स्रष्टाका जीवन सङ्गिनीहरूको सम्मान नेपालमा यस अघि भएको छैन । कार्यक्रमका आयोजक मध्य एक गायिका निशा देशारका अनुसार कलाकारहरूलाई घरबाट सहयोग भए पछि मात्रै सफल हुने सत्यतालाई मध्य नजर गरी कलाकारहरूका जीवन सङ्गिनीहरूको पनि सम्मान कार्यक्रम समावेश गरेका हौँ ।
नेपालमा शास्त्रीय सङ्गीतको इतिहास धेरै पुरानो छ र यसको जरा धेरै गहिरो छ। नेपाली शास्त्रीय सङ्गीतमा विभिन्न शैली र परम्पराहरू रहेका छन् । नेपालमा सिकाउने र सिक्ने परम्परा गुरु–शिष्य परम्परामा आधारित छ । जुन गुरु–शिष्य परम्परामा ध्रुपद सेन्टरको कार्यक्रममा स्पष्ट देखिन्थ्यो ।
कार्यक्रममा प्रस्तुत सङ्गीतले सङ्गीत प्रेमीहरूलाई उच्चतम स्तरको शास्त्रीय सङ्गीतको आनन्द प्रदान गरेको थियो । यस्ता कार्यक्रमहरू आयोजना गरी राख्न सकियो भने शास्त्रीय सङ्गीतमा नयाँ पुस्ताहरुलाई पनि आकर्षणका साथ सहभागी गराउन सहयोग मिल्छ ।
तस्बिरहरु ः ध्रुपद सेन्टर नेपाल को फेसबुक पेजवाट
