नर्थ क्यारोलाइना नेपाली साहित्य समाज, अनेसास नर्थ क्यारोलाइना च्याप्टरको आयोजनामा जुन २२, २०२४ अर्थात् असार १, २०८१ मा चन्द्रमणि गुरागाईँद्वारा लिखित पुस्तक “भीर गाउँदेखि भीमचौरी सम्म” माथि छलफल तथा अन्तरक्रिया कार्यक्रम सम्पन्न भयो । उक्त कार्यक्रममा संस्थाका अध्यक्ष शिशिर खनालले उपस्थित सबैलाई स्वगत गर्नुभयो भने संस्थाका सल्लाहकार ईश्वर देवकोटाले स्रष्टा चन्द्रमणि गुरागाईँ खादा ओढाएर सम्मान भएको थियो।
साहित्यकार डा. ऋषि बस्ताकोटीले पुस्तकका लेखक चन्द्रमणि गुरागाईँको संक्षिप्त परिचय दिनुको साथै छलफलका सहभागी साहित्यकारहरू क्रमशः डा. हरिहर प्र. भट्टराई, ईश्वर देवकोटा, शिखर दुलाल तथा डा. निलम कार्की निहारिका माझ पुस्तकमाथि आ-आफ्नो धारणा राख्न अन्तरक्रियाको ढोका खोल्नुभयो।
साहित्यकार भट्टराईले पुस्तकभित्र रहेको रोबोटले किताब तान्ने हन्ट लाइब्रेरी पढेपछि उक्त लाइब्रेरीका दाता जेम्स हन्टको बारेमा बृहत् चर्चा गर्नुको साथै पुस्तकभित्र रहेका विभिन्न लेखहरू पछिल्लो पुस्तालाई महत्त्वपूर्ण हुने कुरा बताउनु भयो। साहित्यकार देवकोटाले विधवा बुहारीलाई सेतो सारी लाउन नदिएको पढेपछि लेखक परिवर्तनका बाहक भएको कुरा बताउनु भयो। साहित्यकार निहारिकाले “भीर गाउँदेखि भीमचौरी सम्म” पढ्दा हरेक पाठकलाई कुनै न कुनै कथाले आफू सँगसँगै लैजान्छ, यो पुस्तकले अघिल्लो पुस्तालाई पनि चिनाउने मौका पाएको छ जुन कुरा लोप हुन लागेका थिए भन्नुभयो। साहित्यकार दुलालले पुस्तकभित्रका हरेक लेखले आफूलाई तान्दै तान्दै आफै पढेको साजिलाल माध्यमिक विद्यालय, हुर्किएको आफनै घर र आफनै बुवाहरूले उभिनका लागि गरेको दुःखसुखमा पुर्यायो भन्नुभयो । यस्तै साहित्यकार न्यौपानेले पढेका लेखहरूले आफूलाई पनि उत्तिकै तानेको र “भीर गाउँदेखि भीमचौरी सम्म पुस्तक पठनीय साहित्यिक पुस्तक रहेको कुरा बताउनु भयो ।
साहित्यकार बस्ताकोटीले छलफलका सहभागीहरूका प्रश्न र उत्तरहरूमा सहजिकरण गर्ने क्रममा “भीर गाउँदेखि भीमचौरी सम्म” पुस्तकमा लेखकको आफनो मात्र विगत नभएर समाजका अरू ओझेलमा परेका मान्छेहरूसमेतको विगत समेटेर लेखेको यो सँग्रहले अरूलाई प्रेरणा दिएको कुरा बताउनु भयो । यस्तै लेखककी जेठी बुहारी रमा सुबेदी गुरागाईँले आफना ससुरा बुवाले भर्खर कलेज गएका विद्यार्थीजस्तो रातदिन घोटिपछि यो पुस्तक जन्मिएको हो । बुवाले थाहा नपाएका सत्य तथ्यलाई स्थलगत अवलोकन गर्न जाँदा आफू पनि सँगसँगै गएकीले यस पुस्तकमा आफ्नो जीवनका अनुभवहरू नै लेखेको कुरा बताउनु भयो । संस्थाकी सदस्य सुजाता ढुङ्गेलले आफू उपस्थित हुन नसके पनि ‘भीर गाउँदेखि भीमचौरी सम्म’ पुस्तक पढेपछि लेखकले आफ्नो अनुभव लेख्दा सबै बाहरूलाई प्रतिनिधित्व गरेको र यो पुस्तक अबको पिढिं लाई अध्ययनको लागि कोसेढुंगा हुने कुरा अडियो मार्फत बताउनुभयो ।
दर्शकहरूमध्येबाट शिव पलाँस र राजन पौडेलले आ-आफ्नो मन्तव्य राख्नुभएको थियो भने “भीर गाउँदेखि भीमचौरी सम्म” का स्रष्टा श्री चन्द्रमणि गुरागाईँले सहभागीहरूले उठाएका प्रश्नहरुको उत्तरमा आफूले जे देखे, जे भोगेँ त्यही लेखेँ भन्नुभयो।
कार्यक्रमलाई समापन गर्दै लेखककी कान्छी छोरी नम्रता गुरागाईँले आफना बुवाको अन्तर्मन कोट्याउँदा दाम्लाका पोया फुस्किएजस्तो फुस्किएको वहाँका जीवनका उकाली ओरालीका दस्ताबेजहरू लेखहरूमा लिपिबद्ध गर्न अनुरोध गरेपछि बुवा आफैले समेटेर पुस्तकमा लिपिबद्ध गरेकाले आज इतिहासको गर्भमा लुक्न लागेका महत्त्वपूर्ण कुराहरूको उजागर गरी पुस्तक भएर ताते ताते गर्दै अमेरिकासम्म आई पुग्नु साथै छलफलको विषय हुनु आफैमा महत्त्वपूर्ण कुरा भएको बताउनु भयो । साथै प्रेरणाको श्रोतको केही हिस्सा नर्थ क्यारोलाइना नेपाली साहित्य समाजले लिएको कुरा पनि नम्रताले बनाउनु भयो ।
