कवितामा आधारित रियालिटी शो ‘द पोएट आइडल सिजन २ ’को उपाधि सिक्किमका सिमियोन सुकिता राईले जितेका छन् । शनिवार बेलुकी भएको अन्तिम प्रतिष्पर्धामा मुस्कान पोखरेल, विजय लुइँटेल र मोहित जोशीलाई पछाडि पार्दै राईले उपाधि जित्न सफल भए ।
उत्कृष्ट ४ कविहरूले ग्राण्ड फिनालेमा आ-आफ्नो अन्तिम कविता प्रस्तुत गरेका थिए ।
विजेताले कार्यक्रमको तर्फबाट रू दश लाख (१०,००,०००) पाउनुका साथै प्रकाशक कथालयका तर्फ बाट किताब प्रकाशनको सम्झौता पनि प्राप्त गरेका छन् ।
प्रख्यात कवि तथा गीतकार क्षेत्रप्रताप अधिकारीको सम्झनामा भएको यस कार्यक्रमका निर्माता/निर्देशक क्षेत्रप्रताप अधिकारीकै सुपुत्र अमनप्रताप अधिकारी हुन् ।
सहभागीहरूमध्येबाट विभिन्न चरणहरू पार गर्दै १४ जना कविहरू छानिएका थिए । छानिएका कविहरू ऋषि बहादुर राई, डा. मुस्कान पोखरेल, सरला छेत्री, मोहित जोशी, कृतिका कोइराला, अनिल विद्रोही उर्फ गोर्खे चार्ली, सिमियोन सुकिता राई, विनायक पन्त, विजय लुइटेल, बुङछेङ राई ‘सेचन’, अनु शाही, विशाल नाल्बो, विपना अधिकारी र सबिना राई थिए । यी १४ जना बाहेक मुक्ता गौतमले वाइल्ड कार्ड एन्ट्री पाएकी थिइन् ।
प्रतियोगिताको निर्णायकमा कविद्वय विप्लव प्रतीक र उपेन्द्र सुब्बाका साथमा निर्देशक तथा रंगकर्मी अनुप बराल र अभिनेत्री केकी अधिकारी थिए । कार्यक्रम अभिनेता दिव्यदेव पन्तले सञ्चालन गरेका थिए ।
२०८० माघ २९ बाट शुरुवात भएर २०८१ जेठ १२ मा इमाडोलको एड्भान्स स्टुडियोमा सिजन – २ भव्यताका साथ सम्पन्न भएको छ ।
‘द पोइट आइडल – सिजन २’को विजेता कविले दस लाख रूपियाँ नगद पाउनुका साथसाथै कथालय इन्क पब्लिसिङ्ग हाउसका तर्फबाट विजेता कविको कवितासङ्ग्रह प्रकाशन हुँदैछ । यस कार्यक्रमका दौरान विशिष्ट १४ कविहरूले विभिन्न एपिसोड र चरणमा तयार पारेको कविताको पनि प्रकाशन भएर कार्यक्रममा उक्त किताबको विमोचन भएको थियो ।
