ध्रुपद गुरुकुल काठमाडौँले होटेल सन सेट भ्युमा ध्रुपद कन्सर्टको आयोजना गरेको छ । कार्यक्रमको पहिलो प्रस्तुतिमा ध्रुपद गायक विशाल भट्टराई र इनोउवे सो ले राग श्याम कल्याणमा विलम्वित, मध्य र द्रुत आलापमा युगल गायन प्रस्तुति दिए । साथै “आज बृज में उडत गुलाल, गोपीसँग खेले नन्द के लाल“ बोलको धामार गीतमा भारतीय पखावज वादक ज्ञानेश्वर देशमुखको पखावज वादनले वातावरण उत्साहमय बनेको थियो । राग मेघमा सादरा गाएर कार्यक्रम समापन हुँदा आकाशबाट परेको सिम सिम पानी र शीतल हावाले वर्षायाम अझै बाँकि रहेको झल्को दिएको थियो।
पुणे महाराष्ट्रबाट आएका कलाकार ज्ञानेश्वर देशमुखले ध्रुपद संस्थान भोपाल गुरुकुलमा सङ्गै साधना गरेका गुरुभाई द्वय इनोउवे सो र विशाल भट्टराई सङ्ग नेपालमा पहिलो चोटि कार्यक्रम गर्न पाउँदा धेरै खुसी लागेको बताएका थिए । त्यस्तै कार्यक्रममा सहभागी चाइना कि सङ्गीत गुरु सिया वाङ्गले ध्रुपद सङ्गीतमा आत्मालाई भित्रैबाट महसुस गराउन सक्ने क्षमता रहेको आफ्नो अनुभूति सुनाइन् । विश्व भाषा क्याम्पसमा पढ्ने सागावा सौइचिरोले पहिलो चोटि नयाँ सङ्गीत सुनेको र गाउँदा दुवै जनाको आवाज मिसिएर एउटै हुँदा अदभूत अनुभव भएको सुनाए ।
ध्रुपद गुरुकुल काठमाडौँका उपाध्यक्ष रवि शाहले एकोस्टिकमा ध्रुपद सुन्न उल्लेख्य श्रोताहरू उपस्थित भएको र स्वरको वास्तविक आनन्द दिन केही हद सम्म सफल भएकोमा खुसी लागेको र भविष्यमा अझै बढी श्रोता सम्म पुग्ने प्रयास रहने बताए । कार्यक्रममा बाँसुरी वादक नगेन्द्र विक्रम राई, नेपालका पखावज वादक मुकेश शाक्य, मेक्सिको की कलाकार थुप्तेन खान्द्रो लगायत सङ्गीत प्रेमीहरूको उल्लेख्य उपस्थिति रहेको थियो।
इसराजवादक सन्तोष भक्त श्रेष्ठले कलाकारहरूलाई स्वागत गरेर सुरु भएको सो कार्यक्रम डा.पार्वती घिमिरेले सञ्चालन गरेकी थिइन् ।
शास्त्रीय सङ्गीतको जननी “ध्रुपद“ को संरक्षण र प्रवर्धनको लागी ध्रुपद गुरुकुल काठमाडौँले महत्त्वपूर्ण योगदान दिँदै आएको छ। भारत वर्षमा प्रचलित गुरु शिष्यको यस प्राचीन परम्परालाई जोगाएर नेपालमा मात्र नभई सम्पूर्ण भारत वर्ष मैँ नयाँ सुरुवात भई रहेको आभास भारत, युरोप लगायत विश्वबाट गुरुकुलमा सिक्न आउने विद्यार्थीहरूले प्रष्टयाई रहेका छन्। यो अन्तर्राष्ट्रिय विद्यार्थीहरूको लागि आवासीय सुविधा सहितको पहिलो संस्था हो।
