चित्रकारितामा इतिहासका पृष्ठहरु समेट्न सिपालु हरिप्रसाद शर्मा नेपालको महत्वपूर्ण ऐतिहासिक घटनाक्रमहरुलाई चित्रमा उतार्न सफल चित्रकारका रुपमा विख्यात छन् । पुरातत्व विभाग र शा.ने.वा.नि.मा धेरै समयसम्म उत्सर्गहरु पोखिसकेका यिनी कलाकार भई बाँँच्न पाउँदा गौरव पोख्ने गर्छन् । आई.ए. सम्मको औपचारिक शिक्षा हासिल गरेका कलाकार हरिप्रसाद शर्माले ११ वर्षको उमेरमा कलाकार जीवरत्न शाक्यबाट चित्रकलाको प्रारम्भिक ज्ञान प्राप्त गरेका थिए । प्रख्यात कलाकारहरु कालीदास श्रेष्ठ र चन्द्रमान मास्केका चेलाका रुपमा देखिएका यिनी पछि जुद्धकला पाठशालामा केही वर्ष अध्ययन गर्न पाएका अनुभवले खारिएका पाका चित्रकार हुन् ।
कलामार्फत् इतिहास देखाउन सफल कलाकार । प्राचीन इतिहासका अध्येता यिनी इतिहासलाई जीवन्त तुल्याउन आफ्नो कलामार्फत् सङ्घर्षशील छन् । यिनका सबैजसो चित्रकारितामा इतिहास चिहाइरहेको देखिन्छ । त्यसैले यिनका चित्रहरु सर्वसाधारणदेखि लिएर विद्वतजनहरुसम्म पनि प्रभावित छन् । यिनले आयोजना गर्ने कला प्रदर्शनीहरु उच्चकोटिका हुन्छन् । इतिहासलाई कलामा समेट्नु भनेको चानचुने कुरा थिएन, यही महत्वपूर्ण काम यिनले कलाजगत्मा देखाउन सफल छन् । चित्रहरु हेरिरहूँजस्तो देखिनु, चित्रमा वास्तविकता रहेकै कारणले प्रभावकारी देखिनु यिनका कलाकारितामा देखिंदा शुभलक्षणहरु हुन् । ८१ वर्षीय जेष्ठ कलाकार हरिप्रसाद शर्माका चित्रले लिच्छवीकालीन र मल्लकालीन इतिहास, संस्कृति र जीवनशैली देखाइरहेको प्रतीत हुन्छ । अंशुवर्माको शासनकालमा बनेको कैलाशकूट भवनको चित्रण, अरनिकोको चीनयात्रा, स्वयम्भू र बौद्धनाथ स्तुपाको कलात्मक वर्णन गरिएका यिनका चित्रहरु प्रसिद्ध छन् ।
लिच्छवी, मल्ल र शाहकालीन इतिहास, वास्तुकला, जनजीवन तथा लोपप्रायः काठमाडौं उपत्यकाको सांस्कृतिक विविधताका पक्षहरुलाई चित्रकलाको माध्यमले जगेर्ना गर्ने उद्देश्यका साथ हालसम्ममा ८० वटा चित्रहरुको निर्माण गरिसकेका यिनी चित्रको माध्यम पानीरङ्ग र तेलरङ्गलाई बनाउँछन् । वि.सं. २०१३ सालमा नै चतुर्थ बौद्ध सम्मेलनमा आयोजित चित्रकला प्रदर्शनीमा नेपाल कला समितिको तर्फबाट सहभागिता जनाइसकेका यिनी थुप्रै कला प्रदर्शनीमा सक्रिय सहभागिता जनाइसकेका वरिष्ठ कलाकार हुन् । यिनका चित्रकला सम्बन्धी प्रकाशनहरुमा ‘ऐतिहासिक चरणहरुमा काठमाडौं’(Kathmandu llVaey Down the Ages) शीर्षकमा २५ वटा तैलचित्रको पुस्तक प्रकाशन हुनाका साथै २० भन्दा बढी चित्रहरु पोष्टरका रुपमा प्रकाशित छन् । यसका हजारौंप्रतिहरु देश–विदेशका कोठाहरु, होटेल र रेष्टुराँहरुमा सजिएका छन् ।
वरिष्ठ कलाकारका रुपमा नेपाल कलाकार समाजद्वारा २०५९ मा नै सम्मानित भइसकेका यिनले राष्ट्रियस्तरका ललितकला प्रज्ञा सम्मान २०७३ मा र मदन भण्डारी राष्ट्रिय पुरस्कार, २०७५ मा प्राप्त गरेको देखिन्छ । कलामा यिनले पु¥याइरहेका अनगिन्ती सेवाका हरफहरु उल्लेखयोग्य मात्र होइनन्, ऐतिहासिक र गौरवशाली छन् ।
