अर्थर मिलरको नाटक ‘डेथ अफ सेल्सम्यान’ को नेपाली संस्करण ‘यौटा सपनाको अवसान’ वी रिडले शनिबार सार्वजनिक गरेको छ ।
कार्यक्रममा कवि तथा अनुवादक विप्लव प्रतीक, निर्देशक अनुप बराल र गोविन्द पराजुली, साउन्ड र प्रोडक्सन डिजाइन देव न्यौपाने, नाटककै कलाकारहरु दिया मास्के, विकास जोशी, सुरज मल्ल, अभिषेक खड्का र अविरल प्रताप अधिकारीले नाटकको पुस्तक विमोचन गरेका हुन् ।
नाटक ‘यौटा सपनाको अवसान’ ०७९ चैतमा मण्डला थिएटरमा मञ्चन गरिएका थियो । मण्डलमा ३३ दिनसम्म चलेको नाटकको ३६ वटा शो मञ्चन गरिएको वि रिडले जनाएको छ । विमोचन कार्यक्रममा कवि तथा अनुवादक विप्लव प्रतीकले नाटक मञ्चनदेखि लिखित पुस्तक बजारमा ल्याउनु खुशीको कुरा रहेको बताए ।
निर्देशक अनुप बरालले नाटकको स्क्रिप्ट लेख्दा र मञ्चन हुँदा छुट्टाछुट्टै रुप लिने हुँदा नाटकको दुई पटक जन्म हुने गरेको बताए । ‘कुनै किताब पढिसकेपछि अध्यारो कुनामा छोड्ने र फर्केर हेर्न मन लाग्दैन,’ उनले भने, ‘तर डेथ अफ सेल्सम्यान किताब सिरानीमा राख्न मन लाग्यो र त्यसकै नाटक मञ्चन गर्नुपर्छ भन्ने लाग्यो ।’
नाटकमा लीला चरित्र निभाएकी कलाकार दिया मास्केले लीलाको भूमिका निभाउन मनोवैज्ञानिक रुपमा गाह्रो भएको सुनाइन् । घर चलाउने, हरेक सम्बन्धलाई जोड्ने भूमिकामा लीला रहेकोले मैले आफ्नो आमा, दिदी, भाउजु लगायतलाई हेरेर भूमिका निर्वाह गरेको उनको भनाइ थियो । नेपालमा नाटक व्यावसायिक भइनसकेको भन्दै निर्देशक गोविन्द पराजुलीले व्यवसायिक वातावरणतर्फ बनाउनकै लागि नाटक निर्देशन सुरु गरिएको बताए ।
