कवि शिरोमणि लेखनाथ पौड्यालको १३९ औं जन्मजयन्ती मनाइएको छ । सञ्चारग्राममा आयोजित कार्यक्रममा लेखनाथ पौड्यालको पूर्णकदको सालिकमा माल्यार्पण तथा कविता वाचन गर्दै उनको जन्मजयन्ती मनाइएको हो ।
कार्यक्रममा त्रिमूर्ति निकेतनका अध्यक्ष इन्दिरा प्रसाईंले कवि शिरोमणि पौड्यालसँगै नाट्यसम्राट बालकृष्ण सम र महाकवि लक्ष्मीप्रसाद देवकोटाका पूर्णकदको सालिकमा माल्यार्पण गर्दै तीनै स्रष्टाहरुप्रति श्रद्धा अर्पण गरिन् ।
कार्यक्रममा निकेतनका अध्यक्ष प्रसाईं, लेखनाथ पौड्याल काव्यसभाका संयोजक प्रा.केशव सुवेदी तथा सदस्यसचिव नरेन्द्रराज प्रसाईंले त्रिमूर्तिहरु कवि शिरोमणि, नाट्यसम्राट र महाकविले देखाएको बाटोमा हिँड्नु नै त्रिमूर्तिप्रतिको सच्चा श्रद्धाञ्जली रहने भाव व्यक्त गरे । कार्यक्रममा गीता निरौला भण्डारी, यादव भट्टराई, ललिता दोषी, भगवती बस्नेतले कविता वाचन गरेका थिए ।
२०११ सालमा पौड्यालकै शुभजन्मोत्सवको उपलक्ष्यमा काठमाडौंमा पौड्यालको रथयात्रा गरिएको थियो । गोपाल पाण्डे असीमको अग्रसरतामा देवकोटा र समसमेत भएर पौड्याललाई रथारोहण गराइएको थियो । पौड्यालका डेढ दर्जन जति कृति प्रकाशनमा आएका छन् । ती कृतिहरू नेपाली आधुनिक भाषा साहित्यका अनुपम नमुना मानिन्छन् । साहित्यप्रतिको कदरस्वरूप पौड्याललाई मरणोपरान्त २०२६ सालमा त्रिभूवन प्रज्ञा पुरस्कार प्रदान गरिएको थियो ।
