महाकवि लक्ष्मीप्रसाद देवकोटाको ११४औं जन्मजयन्तिको अवसरमा सयपत्री प्रतिष्ठान नेपाल जनागाल काभ्रेले साहित्यकार स्नेह सायमी र लक्ष्मी माली (दम्पत्ति) तथा वरिष्ट स्त्रीरोग विशेषज्ञ एवं साहित्यकार डा सुमनराज ताम्राकार र चण्डेश्वरी श्रेष्ठ ताम्राकार (दम्पत्ति) लाई शनिबार सयपत्री राष्ट्रिय सम्मान २०७९बाट सम्मानित गरेको छ । उहाँहरूलाई नेपाल ललितकला प्रज्ञा प्रतिष्ठानका कुलपति एवं कार्यक्रमका प्रमुख अतिथि के. के. कर्माचार्यले सम्मानित गर्नुृ हुँदै सयपत्रीको दम्पत्ति सहित सम्मान गर्ने परम्परा नौलो अनुकरणीय र उदाहरणीय भएको चर्चा गर्नु भएको थियो । सयपत्री सम्मानमा सयपत्रीको माला, दुबोको माला, दोसल्ला, सम्मान पत्र, तिहारको मसला, फलफूल र बाटो खर्च ५०००।- रहेको छ ।
प्रतिष्ठानका सल्लाहकार एवं साहित्यकार मोहन दुवालको सभापतित्वमा भएको कार्यक्रममा विशेष अतिथि प्रा.डा.रामप्रसाद दाहाल, प्रा. डा जिवेन्द्रदेव गिरी सम्मानित व्यक्तिहरू स्नेह सायमी, लक्ष्मी माली र डा सुमनराज ताम्राकारले बोल्नु भएको उक्त कार्यक्रममा सयपत्री प्रतिष्ठानका अध्यक्ष राजेन्द्र श्रेष्ठले प्रतिष्ठानको गतिविधि र सम्मानको बारेमा प्रकाश पार्नु भएको थियो ।
कार्यक्रममा बनेपा नपा वडा नं १०का अध्यक्ष चन्द्रबहादुर खडका, आयोजक संस्थाका उपाध्यक्ष प्रद्युम्न न्यौपाने, सचिव रामसुन्दर देउजा लगायतले बोल्नु भएको उक्त कार्यक्रममा एक दर्जन भन्दा बढी श्रष्टाहरूले आ–आफ्नो रचना वाचन गरेका थिए । देवकोटा जयन्तिको अवसर पारी सयपत्री प्रतिष्ठानले २०५५ सालदेखि निरन्तर साहित्यिक कार्यक्रम गरी प्रत्येक वर्ष राष्ट्रिय स्तरका एकजोडी साहित्यकार र काभ्रे जिल्लाको एकजोडी साहित्यकारलाई सयपत्री राष्ट्रिय सम्मानबाट सम्मानित गर्दै आएकोछ । प्रतिष्ठानले हालसम्म ६४ जना श्रष्टाहरूलाई सम्मानित गरिसकेको कार्यक्रममा जानकारी दिइएको थियो ।
