कवि वासु शशीका प्रतिनिधि कविताहरूको सङ्ग्रह ‘पर्खाल लगाएपछि धेरै थोक बाहिर पर्छ’ सार्वजनिक भएको छ ।
कार्यक्रममा प्रसिद्ध कवि एवम् गीतकार कालीप्रसाद रिजाल, यादव खरेल, गायक-सङ्गीतकार गणेश रसिक, वासु शशीकी पत्नी जुलुम वैध, कवि मोमिला र समालोचक राजकुमार बानियाँले कृतिको लोकार्पण गरेका हुन् ।
‘वासु शशी मानवतावादी कवि हुन् र कवितामै जीवन व्यतित गरे,’ लोकार्पित कृतिमाथि बोल्दै कालीप्रसाद रिजालले भने, ‘कवितामा बाँच्ने थोरै कविहरूमध्ये वासु शशी एक हुनुहुन्थ्यो ।’
वासु शशीको कथा ‘लोभीपापी’मा पहिलो हास्यव्यङ्ग्य चलचित्र निर्माण र निर्देशन गरेका यादव खरेलले उनको सरल जीवन र काव्यिक बहुआयामको चर्चा गरे । ‘कविता लेखेर पाउने जति चर्चा नपाए पनि उनी आफ्नो समयका सर्वाधिक शक्तिशाली कवि हुन्,’ खरेलले भने । त्यस्तै, गणेश रसिकले वासु शशीका गीतको चर्चा गरे ।
कृतिगत समीक्षा गर्दै कवि मोमिलाले भनिन्, ‘मानवीयता, राजानीतिक र सामयिक व्यङ्ग्य, प्रेम र जीवन-जगतका मसिना विषयलाई कविता बनाएका शशीका कविताले अबको पुस्तालाई काव्यिक चेत प्रदान गर्नेछन् ।’
त्यसैगरी कृतिका सम्पादक राजकुमार बानियाँले वासु शशी लेखनाथ, देवकोटा, सम, भूपि, रिमालहरूको लहरका कवि भएको र नयाँ पुस्ताले उनका कविता पढ्न नपाएकोमा आफूले यो कृति ल्याउन प्रयास गरेको बताए ।
वासु शशी स्मृति परिषदले आयोजना गरेको कार्यक्रममा परिषद्का सचिव कवि प्रधुम्न जोशीले यो कृतिबाट शशीलाई नयाँ पुस्ताले अध्ययन गर्ने अवसर प्राप्त गर्ने बताए । शशीका ८ वटा कृतिबाट समालोचक राजकुमार बानियाँले चयन गरेका ११८ वटा कविताहरू यस सङ्ग्रहमा समावेश गरिएका छन्
वासु शशीका ‘पर्खाल लगाएपछि धेरै थोक बाहिर पर्छ’ सार्वजनिक
